Nkah pơk 7 nkô̆ gay wat jêh tay siƀŭt mbơh n’glôch jêh tâm let năp tay, Tổng Bí thư, Kruanh dak Tô Lâm lah rjăp, n’glôch jêh ân uănh năl sŏng dăng ăp ntŭk rbăn lhơ, ăp nkô̆ nău mô hŏ dơi, ăp nău tă ơm gĭt kơt nti, ăp kô̆ yơn kol khan ân droh rklaih tay; nkre, ân ƀư ntoh lư ăp nău tă ơm gĭt kan geh tĭng nău way, kơt: rôih sŏng tĭng rnoh tât đăp mpăn rnoi nuĭh n’hanh chủ nghĩa xã hội; rgâl blău ƀư njêng mhe tay ta jâng nsing mât nâp nău way; ƀon lan lah n’gu tơm, rdâk njêng Đảng kloh uĕh, nâp dăng lam lĕ rngôch; nkra di ăp bôk trong tâm boh têh… Tổng Bí thư, Kruanh dak đă, êng uănh khlay trong uănh jŏ jong n’hanh trong rƀŏng rđău đă hun hao neh dak tâm 100 năm tât. Păng dăn đă, djăt nău rgop, rgum lĕ bôk rngok gĭt blău bah lam Đảng, bah ăp nhih pah kan gŭ mĭn, ăp nuĭh khoa học, nuĭh rnâng kan, ăp rơh kơn kruanh rđău kan, mât bôk kan ăp rơh. Bah meng nkô̆ way blău kan, njrăng đă ân grêt dăch pah kan leo tĭng ƀư, yor nău kan dŭt têh, nău ŭch geh dŭt têh, mông nar ƀư dŭt ngăch, yor kơt nê̆ lah leo ƀư nău kan mô uĕh ri jêr tât rnoh ngăch n’hanh săk tam kan.