Tĭng ƀư bôk nău kan mâp cử tri lôch rơh hop bôk năp, Quốc hội khóa XVI, ôi ntri (4/5), Tổng Bí thư, Kruanh dak Tô Lâm ndrel ăp Đại biểu Quốc hội đơn vị bầu cử mbrô 1 Nkual ƀon têh Hà Nội geh rơh mâp đah âk mpưm cử tri ta 10 phường Ba Đình, Ngọc Hà, Giảng Võ, Đống Đa, Kim Liên, Văn Miếu – Quốc Tử Giám, Láng, Ô Chợ Dừa, Hoàn Kiếm n’hanh Cửa Nam gay mbơh lôch jêh rơh hop n’hanh ơh rblang ăp nău rgop, nău dăn đă bah cử tri.

Ta rơh mâp, ơh nău dăn đă bah cử tri geh tât nău dơi tam mât bôk kan n’gâng kan 2 gưl, Tổng Bí thư, Kruanh dak Tô Lâm lah rjăp cử tri dơn ngăn đŏng nuĭh kan bôk năp dơh glêh lơn, gưl tâm dâng lor nchrăp lơn, siƀŭt dơh ngăch lơn. Yơn lah, nău ƀon lan ŭch rŏng lah trong ntĭt leo mhe ân njêng luh dơi nău rgâl ngăn ngăn tâm rhŏ dŏng nuĭh ƀon lan n’hanh doanh nghiệp; gưl tâm dâng ân dăch dêh ƀon lan, rƀah gĭt nău ŭch geh kan, ntĭm nti nău kan, rgâl nău kan, buăt nthoi n’gâng kan doanh nghiệp, nsing tâm nău ntĭm nti nkre đah nău kan đah nău rêh ăp nar bah nuĭh ƀon lan. Tổng Bí thư, Kruanh dak Tô Lâm lah rjăp du đêt trong rƀŏng têh gay Nkual ƀon têh Hà Nội rgum rđău đă n’hanh tĭng ƀư let năp tay, tâm nê Hà Nội ân n’glăp Luật Thủ đô n’hanh dăp rgum Thủ đô tâm du trong dơn ngoăy gay leo ƀư.