Rƀŭn nchră boăt nthoi đah bơi 35.000 ntŭk ƀoh tâm lam dak. Râng n’hanh ntoh ngơi ntĭm rđău ta rƀŭn nchră, Tổng Bí thư, Kruanh dak Tô Lâm lah rjăp, Nghị quyết mrô 10 ƀư rgâl tâm nău mĭn hun hao, mô hôm tĭng pơk mpông wơt dơn tơm prăk ma lĕ nchrăp lor săch n’hanh dŏng prăk dak bah dih gay ndâk njêng n’hâm soan tâm rlong lam dak.

Jêh rnôk ntĭm kloh ăp nău mô hŏ dơi tâm nău kan wăch rgum FDI năm bah năp, Tổng Bí thư, Kruanh dak Tô Lâm mĭn lah, Nghị quyết 10 n’gluh an ăp nău rƀŏng n’hanh nău đă âk lơn: hun hao wăng sa geh prăk ntuh kơl dak bah dih an hăn ndrel n’hao dơi ƀư tơm têh dăng, dơi nkra njêng, công nghệ n’hanh soan tâm rlong bah jâng wăng sa; nsrôih tât năm 2030 Việt Nam tâm rmôt leo bôk ASEAN mpeh ntŭk ntô ntuh kơl tăch rgâl, dơi tâm rlong, rgâl mĭn ƀư mhe, uĕh nâp nău rhŏ nsum n’hanh dơi wơt dơn ăp nău nchrăp ƀư ntuh kơl dak bah dih ueh nâp âk. Tổng Bí thư, Kruanh dak Tô Lâm lah rjăp, nsrôih mkra nu nău âk ir, samƀŭt mpưm ir. Mô an nuĭh ntuh kơl an hăn âk mpông, roh âk mông nar n’hanh prăk gay mbơh ƀư du nău nchrăp ndâk ƀư tâm di. Nghị quyết mrô 10 lĕ mĭn 6 nău mĭn ntĭm rđău, 6 rgâl têh mpeh nău mĭn hun hao n’hanh n’gluh an tât năm 2030 wăch rgum 200-300 rmen đôlar prăk ntuh kơl na nê̆ dak bah dih. Uănh tât năm 2045, Việt Nam jêng ntŭk nkra njêng, nău rhŏ, rgâl mĭn ƀư mhe n’hanh ƀĭt joet nkual bah âk tập đoàn âk dak.