Ta rơh pah kan, Tổng Bí thư, Kruanh dak Tô Lâm lah rjăp, nău n’glôch jêh Nghị quyết 26 ân uănh năl di, lam lĕ rngôch nău dơi geh, nchŏng kloh ăp mpăng đêt, nău khoah n’hanh nkô̆ nău; nkre rhuăt luh ăp nău tă ơm gĭt kơt nti, ƀư ntŭk nsing dăn đă ăp trong nchrăp, trong nkra mpeh pah kan cán bộ tâm rơh mhe.

Tổng Bí thư, Kruanh dak đă nău n’glôch jêh ân grêt dăch ngăn ngăn, lơn lah ăp nkô̆ nău mhe ntoh luh tâm rnôk dăp rgum nuĭh kan, tâm pă gưl, tâm pă nău kan n’hanh mât dŏng n’gâng kan tâm dâng. Nkô̆ n’glôch jêh ân ƀư kloh ăp ntŭk hôm wăk kol, ăp quy định mô hôm tâm di gay dăn đă rgâl nkra, kơi ntop. Nkre, ân rgâl mhe tay pah kan cán bộ tĭng trong sơch di nuĭh, jao di nău kan, uănh năl cán bộ ma lôch jêh tĭng ƀư nău dơn kan; uănh khlay rdâk njêng rmôt cán bộ geh han săk chính trị, nuih n’hâm uĕh lŏng, nău dơi ngăn ngăn, tŏng an nău ŭch geh hun hao neh dak tâm rơh mhe.