Ăp năm bah năp, đah nău rđău bah Đảng, nău mât uănh Ngih dak n’hanh nău ndrel soan bah lĕ kon nuĭh, trong kan đăp mpăn rêh jêng lĕ geh âk săk rnglăy khlay, tât aƀaơ lam dak geh rlău 99 rkeh nuĭh râng bảo hiểm y tế; nklăp 2,5 rkeh nuĭh lĕ dơi ntop kơl nuĭh rlu ranh, pơk hvi mât njrăng đah nuĭh âk năm mô geh prăk khay rlu ranh. Nău kơl n’hŭch ach o, an manh prăk, jay gŭ, ntĭm nti, dak si, nău kan n’hanh ntop kơl trôk nar lơh lĕ jêng ntŭk nsing nơm bah hăng rkeh rnăk wâl.

Tổng Bí thư, Kruanh dak Tô Lâm an lah, trong kan đăp mpăn rêh jêng lĕ dơi geh âk săk rnglăy khlay. Yơn lah, trôk nar, kop srê, rgop êng n’hanh rgâl bah ntŭk pah kan dôl ƀư geh âk nău khuch mhe. Ŭch nuĭh ƀon lan dơi mât njrăng ta năp nău mâp, Ngih dak an geh nău kơl di, trong mbơh tơih an blău, rdâng n’hanh ntop kơl ngăch. Tổng Bí thư, Kruanh dak đă an ndâk njêng rnoh mrô lam dak mpeh đăp mpăn rêh jêng, mbơh ăp năm tĭng ntŭk n’hanh rmôt ƀon lan. Nău rƀŏng tât năm 2030 lah jêng trong đăp mpăn rêh jêng âk gưl, lĕ rngôch, rgâl mrô, đăp mpăn ueh an ăp nuĭh ƀon lan. Tổng Bí thư, Kruanh dak đă Chính phủ, Quốc hội, Măt trận Tổ quốc Việt Nam, gưl ủy, n’gâng kan ƀon lan n’hanh lĕ kon nuĭh ndrel ty, nsrôih gay ăp nuĭh ƀon lan Việt Nam, bôl ta moh ntŭk n’hanh nău tâm moh nău rêh, dơi mât njrăng ta năp ăp nău mâp têh, dơi gĭt tât ăp nău rhŏ khlay n’hanh geh nău dơi hun hao.