VOV4.M’nông: Ôi lơ 18/7, Tổng Bí thư Nguyễn Phú TRọng râng ndrel ntoh nau ngơi tâm rnôk nkah 60 năm Nar ndâk nau tâm boh nchră nau 5/9, ndrel 45 năm nar ký ton nau tâm boh kan nsum ndrel tâm boh ăp ntil Việt Nam-Lào (18/7), Năm tâm rnglăp tâm boh Việt Nam-Lào, Lào-Việt Nam 2022 geh ƀư ta Thủ đô Hà Nội. Ndrel râng geh ăp rđau kan mhe, rđau kan ơm bah Đảng, Ngih dak ndrel wa Bounthong Chitmany, Uỷ viên Bộ Chính trị, Rnâng kan Ban Bí thư Đảng ƀon lan cách mạng Lào.

  Groi Kruanh dak Lào leo bôk rmôt kan ntoh măt gưl prêh bah Đảng, Ngih dak Lào tât râng nar nkah. Ntoh nau tâm nar rƀŭn, Tổng Bí thư Nguyễn Phú Trọng lah rjăp, 2 dak tâm dăch tâm dơh, ndrel ngêt nsum du trong dak rkong Mekong, ndrel nsing nkơi tâm yôk Trường Sơn têh nâp, Việt Nam ndrel Lào geh nau vay tâm boh tâm dăch, tâm rgop ngăn tâm lôch nau jong ndâk neh dak ndrel mât neh dak bah bar rnoi mpôl.

Bar Đảng, bar Ngih dak ndrel ƀon lan bar dak lơn ma tâm rnglăp, tâm dăch, n’hao nau tâm boh lơn gay ma ndrel rlet nau jêr, lŏ ƀư nâp nkô̆ nau đăp mpăn rnoi mpôl ndrel chủ nghĩa xã hội, ndrel ƀư lôch n’hâm nơm gay ma mât ndrel ma mô rlu bun dăp ân nau tâm boh têh, tâm rnglăp ueh ndrel tâm boh ăp ntil Việt Nam-Lào./.

Nŭih rblang: H’Thi