Ôi 25/3, Tổng Bí thư Tô Lâm hŏ ƀư tơm rơh hop tâl puăn Tiểu ban Nuĭh kan gay mĭn uănh du đêt nkô̆ rgâl nkra, kơi ntop trong nchrăp Trong rƀŏng pah kan nchrăp nuĭh kan Đại hội XIV bah Đảng. Nsing ta nău mĭn uănh ăp siƀŭt mbơh, siƀŭt rblang dăn n’hanh nău rgop bah ăp nuĭh tâm Tiểu ban Nuĭh kan, Tổng Bí thư Tô Lâm lah kloh, Đại hội XIV geh nkô̆ khlay ntơm an du rơh hun hao mhe, “rơh hun hao lhung jong geh ndrŏng, uĕh dăng bah rnoi nuĭh”.

Rblang năl tâm nô nău aƀaơ, Tổng Bí thư n’gluh nău đă ŭch geh dŭt âk tâm pah kan nchrăp n’hanh n’hao săk blău ăp siƀŭt nchrăp lor Đại hội XIV bah Đảng, tâm rnôk nê trong rƀŏng pah kan nchrăp nuĭh kan. Tổng Bí thư lah rjăp, nău ŭch tât n’glĕ dŭt lah ân rdâk njêng dơi du mpôl Ban Chấp hành Trung ương Đảng, Bộ Chính trị, Ban Bí thư, lơn lah ăp kruanh rđău kan n’gâng tơm ntoh lư ngăn mpeh nuih  n’hâm uĕh lŏng, nău blău kan, nău nsing nơm; nău tâm rnglăp, dơn ngoăy âk, nsum suan, du nuih n’hâm, nsrôih rgâl blău njêng mhe n’hanh tĭng ƀư jăp nău kan, nău khlay rđău đă bah Đảng đah neh dak tâm rơh hun hao mhe; rgop nsĭt tay hơm răm, đăp mpăn an ƀon lan.