Ntŭk gŭ kâp mât njrăng bri Đa Ra Hoa, mpeh Ban mât njrăng bri tu dak nching sial Đa Nhim geh nău dơn mât njrăng rlău 9.600ha bri. Bol lĕ ma ntŭk gŭ kâp mât njrăng geh 8 cán bộ, nuĭh kan mât njrăng bri hôm dơi mât njrăng bri uĕh đŏng nơm geh 13 Rmôt tâm boh mât njrăng bri râng. Lĕ rngôch nuĭh kan tâm ăp rmôt dơi nkhôm prăk săm mât njrăng bri đah rnoh âk ntơm bah 800 tât 900.000prăk/1ha. Lĕ rngôch rnoh prăk ma ăp nuĭh kan bah 13 Rmôt tâm boh mât njrăng bri dơn geh ăp năm ntơm bah 20 tât 25 rkeh prăk. Nô Klong Cil Sơn, Rmôt tâm boh mât njrăng bri mbrô 5, ƀon Ju Mnang, an gĭt:  

Lah uĕh Đảng, Ngih dak dŭt âk hŏ nta trong dơh an gâp dơi râng tâm Rmôt tâm boh mât njrăng bri. Nơm geh rnoh prăk dơn mât klŭp dơi trok tâm an săm mât njrăng bri ma rnăk gâp n’hanh kônh wa tâm ƀon rgâl geh dŭt âk tâm nău rêh.  

Ƀan mât njrăng bri tu dak Đa Nhim dơi n’gor Lâm Đồng jao mât njrăng bri bơi 28.000ha mpeh xã Lạc Dương n’hanh phường Lang Biang – Đà Lạt. Năm 2026 jao bơi 25.000ha bri an 40 Rmôt tâm boh mât njrăng bri đah rlău 1.000 nuĭh, lơn âk lah ƀon lan rnoi K’Ho ndrel 4 mpôl kan geh sa prăk săm mât njrăng bri.

Ntơm bah bôk năm tât aƀaơ ma pah kan ôp uănh, ăp Rmôt tâm boh mât njrăng bri hŏ ban saơ n’hanh ndrel Ƀan mât njrăng bri tu dak nching sial Đa Nhim đă ntrơn du 69 ntŭk bri, neh bri geh rŭn in đah lĕ rngôch rnoh hvi rlău 14ha; ƀư 6 tơ̆ đă ntrơn du ta ăp ntŭk lơh joi lŭ loih ta tiểu khu 140, 142 n’hanh 143… Tâm rơh kơp dơn quý I n’hanh manh đor lor rơh 1 năm 2026, lĕ rngôch rnoh prăk ma ăp Rmôt tâm boh mât njrăng bri n’hanh 4 mpôl dơn geh rlău 6,8 rmen prăk. Wa Đinh Hữu Được, Groi kruanh Ƀan mât njrăng bri tu dak nching sial Đa Nhim, lah rjăp, trong kơl săm mât njrăng bri dơi nkrêp lhăt đah nău geh, nău dơn kan bah nsum mpôl n’hanh nuĭh ƀon lan ƀon tơm ta ntŭk jêng rnoh hvi neh bri bah ntŭk dja nar lơn ma dơi mât njrăng uĕh:

“Nsĭt nău dơi mpơl saơ dŭt kloh nê lah nău gĭt êng bah nuĭh ƀon lan lơn lah ăp rnăk dơn mât njrăng bri dơi n’hao geh. Ƀư tĭng nkô̆ tâm boh hŏ ký ton đah ntŭk kan khân păng hŏ ndrel hăn đah ntŭk kan tâm pah kan rsong hăn treng nđôi bri lơn lah pah kan đă ntrơn du yơn neh bri geh rŭn in, đă ntrơn du ăp ndơ rdâk njêng mô geh nău way ta neh bri hŏ dơi jao an Ƀan mât njrăng bri tu dak nching sial Đa Nhim mât. Bah meng nê pah kan hun hao bri nuĭh ƀon lan nđơr râng đŏng lơn lah ăp rnăk dơn mât klŭp”.

N’gor Lâm Đồng aƀaơ dôl dâk leo lam dak đah rlău 1,1 rkeh ha bri, tâm nê geh tât rlău 700.000ha tŏng nău dơi pă an ndơ săm mât njrăng bri. Tơm prăk kaih khlay dơi trok tâm ăp năm bah trong kơl săm mât njrăng bri dôl kơl ăp nuĭh tơm bri Ngih dak mât njrăng uĕh neh bri dơi jao. Ndrel đah nê bơi 176.000ha dơi mât njrăng na nê̆ đah nklăp 14.400 rnăk, ăp nuĭh, ăp ƀon dơn mât njrăng bri đah rnoh prăk dơn geh ăp năm ntơm bah 20- 25 rkeh prăk hŏ rgop rgâl geh nău rêh n’hanh joi geh trong rêh an nuĭh ƀon lan. Wa Nguyễn Văn Quang, Groi kruanh UBND xã Đam Rông 4, n’gor Lâm Đồng, an gĭt xã geh rlău 33.000ha bri. Ntơm bah jâng nsing trong kơl trok tâm prăk săm mât njrăng bri, mât njrăng bri n’hanh hun hao bri hŏ jêng ngoăy tâm 3 trong rƀŏng hun hao jŏ jong bah n’gor:

“Mpôl hên kan nsum đah dŭt âk nuĭh tơm bri tât ăp nhih pah kan geh tât an ƀư ăp trong joi geh nău rêh đah bri đŏng. Hŏ tâm nkrêp kan nsum, gŭ mĭn du đêt trong ntĭt leo hun hao wăng sa ta nâm bri. Đah du đêt doanh nghiệp leo hăn pâl nđaih jong nar ri mpôl hên kuăl jă an ƀư ăp trong mât dŏng pâl nđaih. Bah meng nê aƀaơ gay kơl nuĭh ƀon lan đăp mpăn mât bri tâm ban kơt hŏ nkre lơh joi ăp ndơ kah khlay tâm bri gay n’hao geh trong rêh an nuĭh ƀon lan”.

Lâm Đồng lah ngoăy tâm ăp n’gor lor bôk năp lam dak an ƀư trong kơl trok tâm prăk săm mât njrăng bri. Rlău 15 năm aơ ntơm bah nău tĭng ƀư uĕh trong kơl dja, aƀaơ n’gor hŏ rdâk njêng tơm ndơ khlay an pah kan mât njrăng bri n’hanh hun hao bri. Wa Nguyễn Thị Hải, Giám đốc Tơm prăk mât njrăng bri n’hanh hun hao bri n’gor Lâm Đồng, an gĭt, đah nău dơn, trok tâm tơm prăk tĭng trong rƀŏng an ƀư, kloh rvah đăp mpăn nău dơi dŭt âk an nuĭh mât njrăng bri, trong kơl trok tâm prăk săm mât njrăng bri nta trong dơh an du jâng nsing nâp gay pah kan mât njrăng bri n’hanh hun hao bri bah n’gor nar lơn ma lăp ngăn ngăn, jŏ jong lơn:

“Aƀaơ lam n’gor geh rlău 700.000ha dơi dơn prăk săm mât njrăng bri đah rĭng geh ăp năm nklăp 450 tât 500 rmen prăk. Lôch kơp nđăp n’hanh tâm rlak ri rnoh khlay rĭng an 1ha bri gay tĭng ƀư pah kan mât njrăng bri geh nklăp prao, pơh rhiăng rbăn prăk, mô dơn nê geh ăp neh bri dơi nkhôm an rlău 2 rkeh prăk du ha đŏng. Trong kơl trok tâm prăk săm mât njrăng bri lah du tơm ndơ dŭt têh gay an nuĭh tơm bri, an ăp rnăk dơn mât klŭp rvăt năp geh nău rêh n’hanh ntop kơl du gâl an ngân sách bah n’gor tâm pah kan mât njrăng bri”.

Rlău 15 năm tĭng ƀư trong kơl prăk săm mât njrăng bri, Lâm Đồng hŏ tĭng kơn ƀư tơm ndơ bah bri jêng suan ntrôl dăng gay nuĭh ƀon lan krêp dêh, mât njrăng n’hanh hun hao bri Rnôk nău geh bah nuĭh ƀon lan dơi đăp mpăn, nău dơn jăp mât njrăng bri dơi n’hao âk đŏng, njêng jâng nsing gay rƀŏng tât jêng “bri mât êng bri”, rgop hun hao bri jŏ jong. N’gor Lâm Đồng dôl ƀư jêng âk ntil tay n’hanh pơk hvi ăp tơm ndơ geh bah prăk nkhôm săm mât njrăng bri, mô dơn bah thủy điện ma hôm bah rhŏ dŏng pâl nđaih, rhŏ dŏng tơm dak n’hanh ăp trong kan êng ƀa ƀă đŏng. Bah nê, tĭng kơn n’hao geh âk tơm ndơ an nuĭh tơm bri, n’hao nău dơi tam mât njrăng bri gay bri jêng tơm ndơ rêh ngăn jŏ jong an nuĭh ƀon lan.