Ƀon kon se SOS Đà Lạt aƀaơ dôl mât uănh, mât rong 46 kon se kon đơi, kon se geh ntlơi n'hanh kon se geh nău rêh jêr jŏt, bah 5 tât 18 năm deh. Rlău ma nĕ, 34 oh dôl nti ta ăp ngih sam ƀŭt đại học, cao đẳng hôm e dơn geh nău kơl bah ƀon đŏng. Tâm rnglăp đah jay nhih lĕ 8 năm, oh Huỳnh Thị Như Ngọc, kon hŏk jrô 8, saơ aơ kơt du rnăk têh, ntŭk ăp oh nô tâm rŏng, tâm kơl tâm nău nti n'hanh nău rêh: "Ta ƀon ăp oh nô jay kon dŭt lah ŭch rŏng nsum đah hôm geh âk băl ndrel năm deh tâm ƀon ri mpôl hên pâl dŭt lah rhơn, nti nsơm ri ôp nti nsum đŏng. Rơh lễ ăp pơh, ăp mon, ăp oh way uănh mĭn, tâm pă an mpôl hên. Trung thu năm aơ mpôl hên wơt dŭt âk mpôl năch tât khâl n'hanh pă nklâm ndơ".

Ăp yan Trung thu bah năp, ăp oh dơi uănh múa lân, wơt ŭnh jrêng manh, pâl rlưn n'hanh râng ăp nău ƀư nsum mpôl. Năm aơ, ăp rơh mih tât ndal ta Đà Lạt mô ƀư nău răm Trung thu roh đêt. Ăp oh hôm e geh ăp rơh tâm mâp, ăp nklâm ndơ n'hanh ăp mông rƀŭn nsum mpôl. Đah Hoàng Thị Thu Thủy, Tết Trung thu ta ƀon lah ăp nău nkah gĭt ma oh way uănh khlay: "Ăp yan Trung thu tât mpôl oh dơi ăp kônh yơ sĭt ta aơ ƀư bôk nău kan đah ăp nklâm ndơ, ăp nău pâl rlưn. Mpôl oh dơi ƀư bánh chưng aơ, dơi ƀư ŭnh manh, dơi ndrel njroh mprơ ndrel tâm nkoch bri dŭt răm. Năm aơ mih dŭt âk ma ăp kônh yơ sĭt njuăl an oh ăp nklâm ndơ. Oh dŭt lah uĕh n'hanh dŭt lah uĕh mpeh ăp yan trung thu kơt aơ".

Du mblâm bánh, du mblâm ŭnh manh mô lah ndơ tâm măng rgum mbra mô têh mpeh drăp ndơ, yơn đah ăp kon se dôl têh jêng ta ƀon SOS Đà Lạt, nĕ lah nău mât uănh, lah nău ŭch rŏng n'hanh tâm pă. Wa Trần Bảo Long, Giám đốc ƀon kon se SOS Đà Lạt, an gĭt, rlău ma rnoh prăk bah ntŭk kan SOS, nău kan mât uănh kon se ta ƀon hôm dơn geh nău ntop kơl bah n'gâng kan ta ntŭk n'hanh ăp nuĭh lŏng bôk tôr:

"Đah kon se du năm geh 3 rơh Tết: Tết Nguyên đán, Tết Thiếu nhi 1/6 n'hanh Tết Trung thu. Tết Trung thu bah ƀon năm aơ lĕ rngôch ăp kon bah ƀon wơt dơn geh âk nău rŏng nău ŭch kơnh bah ăp gưl n'gâng kan ta ntŭk, bah ăp nuĭh lŏng bôk tôr mpŏng ŭch ndơ̆ an ăp kon du yan Trung thu tŏng ăp, hơm răm"./.