VOV4.M’nông - Nthoi tay nău ƀư mbơh ntĭm tăch n’gluh ăp ndơ lŏ mir Việt Nam, ôi 22/7, Ntŭk kan ntrŭt ngăch tăch rgâl (N’gâng kan Công thương) tâm rgop đah ăp Thương vụ Việt Nam ta dak bah dih n’hanh N’gâng kan Công thương n’gor Dak Lak ƀư rơh ôp mbơh tăch n’gluh ndơ play sầu riêng Việt Nam. Lam dak aƀaơ geh nklăp 85.000ha, rnoh geh ndơ ăp năm bơi 670.000 tấn. Nchroh mbơh tât năm 2025 rnoh geh 1 rkeh tấn. Dak Lak n’hanh Tiền Giang lah 2 n’gor geh rnoh neh n’hanh play sầu riêng leo bôk năp lam dak.

Sầu riêng Dak Lak dŭt âk tăch plôk ntô an nđik

Ndơ sầu riêng dŭt âk dơi tăch n’gluh đah săk play lĕ plôk ntô n’hanh dơi an nđik tăch an Trung Quốc, Đài Loan, du đêt nglăp play rih an dak Nhật Bản. Ta rơh mbơh ntĭm, ăp nuĭh way kan, ntoh măt ăp Thương vụ Việt Nam ta Trung Quốc, Đài Loan, Nhật Bản, Australia, Thái Lan uănh tât ăp doanh nghiệp Việt Nam mpeh ăp nău gĭt ntŭk rwăt, tâm di uĕh kah, trong trok prăk, trong rdêng, bảo hiểm ndơ tăch n’gluh, mkra ăp nău jêr dơi ntoh tâm rnôk tăch n’gluh ndơ sầu riêng an du đêt ntŭk tăch rwăt dak bah dih.

Nuĭh rblang: Y Sưng Phê Ja