Bí thư Tỉnh ủy Dak Lak nchih nkah n’hanh rnê âk ăp nău rgop bah Radio nău ngơi Việt Nam (VOV) lah nsum n’hanh Nhih pah kan way gŭ kan ta nkual Tây Nguyên lah êng đah pah kan rdâk njêng Đảng, rdâk njêng lam trong kan chính trị n’hanh hun hao wăng sa- rêh jêng kon nuĭh bah n’gor Dak Lak tâm bah ri aơ.

Păng an lah, ăp nău nchih, nkoch bah VOV hŏ nkoch geh ngăn bah ăp trong kan wăng sa- rêh jêng kon nuĭh, nău rêh ƀon lan ăp rnoi nuĭh tâm n’gor; nkre ndrel pah kan rdâk njêng Đảng, rdâk njêng lam trong kan chính trị n’hanh rđău đă ƀĭt juet. Đah dơh uĕh bah ntil pơk ƀoh nău ngơi, VOV hŏ nkoch trong nchrăp, trong kơl bah Đảng n’hanh Ngih dak tât dăch lơn đah nkual jru, nkual ngai, nkual ƀon lan rnoi mpôl đê̆; rgop rdâk nâp tay tâm rnglăp lam ƀon lan, mât đăp mpăn chính trị - rêh jêng kon nuĭh ta ntŭk. Bí thư Tỉnh ủy Dak Lak ŭch rŏng VOV ntik n’hao tay suan dăng, nkoch trêng âk ding nău lư mpeh pah kan rđău đă, ƀĭt juet bah n’gor; nkoch nău ŭch rŏng, mpŏng geh di bah nuĭh ƀon lan; rêng lam trong ntĭt leo ƀư uĕh, trong leo ƀư geh nău tam n’hanh ndrel hăn bah n’gor ta njăr trong hun hao.