Năl mpeh nău tât ji luh mham rih năm aơ, PGS.TS Trần Đắc Phu, tă ƀư Cục trưởng Cục Y tế njrăng n’gang lor an lah, nuh srê dja aƀaơ mô hôm tĭng kơt nău way ơm tât khay nuh srê. Lah kơt ntơm nơh nău ji way ntoh hô tâm khay mih lôch nê hŭch mbrơi, ri rnoh âk nuĭh ntưp dơi năl geh wăr năm, kơp lĕ ma khay wai, an saơ geh ma nău nuh srê ntoh mpơl tâm ƀon lan:

Geh ma nău ntoh luh ri aƀaơ ntơm geh nău mpơl hao âk lơn rđĭl đah năm e nơh, nău lah tât duh jêr mô gĭt năl lor di lơn yor mô hôm kâp tât leh khay gay he nchroh rđĭl đah ntơm nơh. Năm aơ ri geh ăp ndơ ƀư mô dơh uĕh, kơt trôk nar, n’hâm sial, rsong hăn bah nuĭh ƀon lan hao dŭt âk đŏng. N’hanh duh hô, mih âk, trôk nar rlău 25 độ nta trong dơh an măch ntưp ji luh mham rih rơ̆ jêng.

Ta Nkual ƀon têh Hồ Chí Minh geh rnoh nuĭh ntưp ji luh mham rih dŭt âk lam dak, kơp tât khay 6/2026, hŏ năl geh 18 rbăn nuĭh ji n’hanh 4 nuĭh khĭt. Ăp nuĭh ntưp ji geh lĕ rngôch ta ăp ntŭk. Tĭng n’gâng kan dak si nkual ƀon têh, nuh srê ji luh mham rih năm aơ geh mpơl hao âk ơm rlău nău way. Du ntŭk dŭt njrăng uănh khlay lah dăp rgum nuĭh ntưp ji dôl geh nău rgâl. Aƀaơ, rlău du n’gul rnoh nuĭh ntưp ji lah bu kuâng, tâm nê rmôt ntơm bah 11 tât 30 năm deh hao âk. Nău dja an saơ ji luh mham rih mô hôm lah nău ji lơn âk ta kon se kơt âk nuĭh nha mĭn. Tiến sỹ, bác sỹ Trương Hữu Khanh, Groi Kruanh chi hội nău ji ntưp rêng nkual ƀon têh Hồ Chí Minh, njrăng đă:

Lơn lah bah nuh srê ji luh mham rih lah nar ma hŏ bah kop lah nha hôm geh jâk tâm săk đŏng. Jêng nuĭh ji nê bah kop yơn ân n’gơch aih, rsong hăn ngăn, mô geh du ntil nău kuăl lah jâk rgănh ri mơ kuăl lah đăp mpăn. Hôm nuĭh nê hŏ bah kop hôm ma săk jăn lêt rgănh mbro, wơi măt, ji ndŭl mô lah r’ah rgănh, mô kah sông ri njrăng uănh geh ma nău wăm ndal. Jêng he ân tĭng groi nđôi mpeh rse suan mham, hao duh mham. Lôch nê lah ân plơ̆ uănh năl tay bol hŏ bah ji.

Ăp nuĭh rnâng kan năl, mô đêt nuĭh ƀon lan hôm uănh lhơ đah nău ji dja. Âk nuĭh gŭ săm êng ta jay mô lah tât ntŭk kan dak si nkai yor mĭn lah aơ lah nău ji ngăn dơm. Tâm rnôk nê, ji luh mham rih mbra jêng tât jru dŭt ngăch, ji luh mham rih jru, djôr lam nuih klơm n’hanh jêng tât khĭt lah mô ơm năl saơ, săm ngăch. Wa Võ Hải Sơn, Groi Cục trưởng Cục njrăng n’gang nău ji, Bộ Y tế an gĭt, nuĭh ƀon lan ân ntlơi mbrơi ăp nău mĭn tih kơt mĭn lah măch dơn deh rơ̆ ta ntŭk dak djơh mô lah nuĭh ƀon lan gŭ ta chung cư, jay prêh dăp mbra đêt geh ma nău ntưp ji dơm. I ngăn, măch rvanh way deh tăp tâm ăp ndơ đâng dak srang uĕh tâm rnăk he đŏng kơt bình kao si, chậu tăm tơm si, bong đâng dak tủ lạnh mô lah ăp ndơ dŏng ngâr dak jê̆:

Nău lư bah năm aơ lah mô an rhai dak ri mô geh ji luh mham rih. N’hanh mpôl hên mpŏng lah ăp rnăk ăp pơh rong an 10 mnĭt gay ra uănh tay tơm rhai dak, tăp măch tâm rnăk wâl.

Ji luh mham rih lah nău ji klach rvê mbra dơi njrăng n’gang lah ăp nuĭh ƀon lan n’hao nău gĭt mât njrăng êng n’hâm suan săk nơm n’hanh nsum mpôl; way tơh dak bình kao si; rgum ndŏk n’hanh rlơt nkŭp ndơ mô dŏng. Nkre, nuĭh ƀon lan ân bĭch kât mŭng, dŏng ăp trong njrăng n’gang măch kăp n’hanh kan nsum đah n’gâng kan dak si tâm ăp nău kuaih kloh uĕh ntŭk gŭ rêh, nkhĭt rhai dak, tăp măch tâm rnăk wâl, ƀon lan.