Ta Ngih dak si Quân dân y đặc khu Phú Quý, ăp nar geh hăng rhiăng nuĭh ƀon lan tât but uănh n’hanh săm ăp nău ji way mâp. Ăp năm dăch aơ, nău kan dak si ta gôl dak lĕ geh âk nău rgâl na nê̆ đah nău ntuh kơl tay ndoh ndơ, pơk hvi âk nău rhŏ kỹ thuật n’hanh n’hao uĕh but uănh săm ji ta ntŭk. Âk nuĭh ji bah năp đaơ an hăn lăp neh kơh ri aƀaơ lĕ dơi nchroh, mkra bôk năp n’hanh săm dâl ta gôl dak, kơl nuĭh ƀon lan n’hŭch prăk, mông nar hăn trong. Wa Nguyễn Văn Hai, ta thôn Quý Hải an gĭt, nkôp đah bah năp đaơ, nău dơi but uănh, săm ji lĕ dơh lơn, rmôt y nai dak si dŭt n’hâm, dơi nsing nơm an nuĭh ƀon lan:

Aƀaơ he tât but uănh ri ăp nai dak si rhŏ uĕh, răm m’ak, but uănh ji jêh nĕ pă dak an kônh wa. Nkôp đah bah năp đaơ ri dak si ta gôl dak hun hao âk lơn hôm. Knŭng geh ăp nuĭh ji mbăn ir an lăp ngih dak si dơm, yor ndoh ndơ ta gôl dak hôm e jêr jŏt.

Trong kan but uănh săm ji way êng năng ta đặc khu Phú Quý aƀaơ ntơm tâm di nău ŭch bah nuĭh ƀon lan. Yơn lah, đah nuĭh mbăn kơt chôt ndal, hao mham play nuih mô lah sôt săk, nău dơi săm ngăch n’hanh săm ta ntŭk hôm e đêt. Tâm rnôk nĕ, nău ndơ̆ nuĭh ji lăp neh kơh knơm tâm âk trôk nar n’hanh nar duk mpan, đê̆ đŏng geh rnôk an rgŏ jă ndeh păr kung gay wơt kơl nău rêh an nuĭh ji.

Tĭng nai dak si Bùi Thị Hảo, Groi Giám đốc Ngih dak si Quân dân y đặc khu Phú Quý, nău ŭch jăch ndăn aƀaơ n’hao dơi mkra săm ngăch ta ntŭk gay kơt dŏng “mông nar khlay” săm rêh nuĭh ji. Aƀaơ ntŭk kan hôm e mô tŏng ăp chuyên khoa jru, ngăn lah hồi sức cấp cứu, nking n’gang ji play nuih n’hanh ngoại thần kinh. Gay mkra jêr jŏt aơ, Ngih dak si lĕ tâm rgop đah Ngih dak si Bạch Mai jă ăp nuĭh way kan na nê̆ hăn gôl dak ntĭm nti săm ngăch rlu tuần hoàn, nkre ntop kơl ntĭm nti jru mpeh săm chôt ndal an rmôt nai dak si ta ntŭk.

Aƀaơ ngih dak si lĕ dơi Ngih dak si Bạch Mai ntop kơl ntĭm nti an dơm an du ekip jru gay săk ngăch chôt ndal, tâm nĕ du hê nai dak si n’hanh du hê điều dưỡng. Mhe nơh dơi N’gâng kan dak si ntuh kơl du mlâm măy CT mkra săm ngăch chôt ndal. Ngih dak si Bạch Mai ntop kơl ntŭk kan rgum nchroh trực tuyến, răk jêh uănh năl bah ngai, rgum nchră an di na nê̆ kơl mkra ngăch ăp nuĭh săm ndal.

Wa Huỳnh Thị Phường Duyên, Giám đốc N’gâng kan dak si Lâm Đồng an gĭt, đặc khu Phú Quý aƀaơ geh 121 cán bộ, viên chức nău kan dak si, tâm nĕ geh 29 nai dak si, lah ntŭk geh rnoh nai dak si rlău rmưn nuĭh ƀon lan âk ngăn n’gor. Đah rmôt aơ, nău kan dak si ntơm tâm di nău ŭch but uănh săm ji an nuĭh ƀon lan ta gôl dak, rmôt tahen n’hanh nuĭh ƀon lan pah kan ta dak lêng.

Yơn lah, ta năp nău đă hun hao nar lơ âk, lơn lah tâm rnôk Phú Quý ntrôl dăng wăch rgum pâl nđaih, nău kan dak si Lâm Đồng kơl lor n’hao dơi but uănh săm ji, ngăn lah hồi sức cấp cứu. Tĭng wa Huỳnh Thị Phương Duyên, N’gâng kan dak si dôl đă nkra, n’hao ngih wâl dak si n’hanh ntop tay ndoh ndơ gay tâm di uĕh lơn but uănh săm ji tâm nău geh êng bah nkual dak lêng gôl dak.

Nău dŭt rhơn lah 100% cán bộ dak si bah Phú Quý lĕ dơi Ntŭk kan săm ngăch Chôt ndal Ngih dak si Bạch Mai na nê̆ tiăr nti hồi sức cấp cứu rlu tuần hoàn n’hanh lĕ dơi an samƀŭt kơp dơn. Nkre, Ngih dak si Bạch Mai ton ntop kơl an dơm lĕ rngôch prăk ntĭm nti an Phú Quý tât năm 2028.

Nău n’hao nuĭh kan, ntĭm nti jru n’hanh ntuh kơl ndoh ndơ mô knŭng kơl n’hao uĕh but uănh samƀŭt an nuĭh ƀon lan đặc khu Phú Quý ma hôm rgop đăp mpăn an nuĭh ƀon lan n’hanh năch pâl nđaih đah nkual dak lêng ngai neh kơh. Aơ lah nău nchrăp khlay gay dak si Phú Quý tâm di uĕh lơn ăp nu nău săm ngăch ndal tâm nău geh êng nkual dak lêng gôl dak.