Nar 8/10, mông nar nchrăp an Nar rgum Văn hóa rnoi Mông tâl 4 năm 2026 ƀư ndăn ngăch ta Điện Biên. Ăp mpôl nghệ nhân, diễn viên, nuĭh tâm rlong bah 11 n'gor dôl rgum tiăr nti, ƀư lôch jêh ăp nău njroh mprơ, nkre nchrăp ăp ntŭk tăch ndơ, ndơ geh ƀư ntĭt êng, nchrăp mbơh ăp nău khlay văn hóa n'hanh ndơ geh ƀư bah ƀon lan Mông tât năch, năch pâl nđaih.

Nar rgum Văn hóa rnoi Mông tâl 4 ƀư ntơm bah nar 9 - 11/10, đah bơi 800 nghệ nhân, diễn viên, nuĭh tâm rlong tât bah 11 n'gor geh: Điện Biên, Tuyên Quang, Phú Thọ, Thái Nguyên, Sơn La, Cao Bằng, Lai Châu, Lào Cai, Thanh Hóa, Nghệ An n'hanh Dak Lak. Êng Điện Biên geh 101 nghệ nhân, diễn viên, nuĭh tâm rlong râng ăp nkô̆ nău văn hóa n'hanh 62 nuĭh tâm rlong râng 6 môn tâm rlong đah 35 nkô̆ nău. Ăp ntŭk djôt tât ăp ndơ geh ƀư nkre đah nău rêh n'hanh văn hóa Mông ăp nkual, bah ndơ nsoh, nah tanh, ndơ mon uk way ơm tât ndơ tuch tăm, ndơ sa kah n'hanh ăp ndơ rhŏ dŏng an nău rêh. Aơ mô knŭng lah ntŭk nkoch ndơ geh ƀư, ma hôm kơl nuĭh ƀon lan wât kloh lơn nkô̆ nău văn hóa bah kơi ăp ndơ geh ƀư.