Tâm êp nglau dak Mỹ Lâm, xã Hoà Thịnh, tâm ăp kêng măng nar Prao ăp pơh, nteh guitar ndrel bâr mprơ khuh m’ak, rgum âk...geh nsum ma tăng n’hiăng sĭm, tăng nteh sial khôm...ta aơ mô hôm geh sân khâu ma ŭnh ang chrat, ma ta aơ knŭng geh ăp màu ndrih ndrel ndrih ngăn ngên bah tơm si tơm gle ndrel ma ăp nŭih ƀon lan mleh mlôn kơt ma nau ueh ơm bah ƀon lan Hoà Thịnh. Ta aơ, nau goh nteh khuh m’ak tă bah ƀon lan ta ơm mprơ êng, ŭch rong êng mông nar, nau blau bah nơm gay ma rhŏ ân nŭih uănh. Ndrel ntơm bah nê, ntŭk aơ jêng ntŭk tât âk ngăn bah âk nŭih tă bah âk ntŭk. He ndrel djăt nau nkoch mbơh bah ƀon lan tâm ntŭk ndrel ma bu năch rnôk tât uănh ta aơ:

‘Ueh ngăn, hun hao ngăn! Ntŭk ta aơ ueh, ueh ngăn ngên! Saơ kơt aơ lah nkre rhơn nkre ma saơ tâm di đŏng”.

Kônh wa rơn ngăn. Păng njêng jêng ntŭk pâl ueh nsum gay kônh wa mra dơi tât gay ma râng ndrel tâm ăp kêng măng nar Prao, dŭt rhơn. Nê lah du nau ueh”.

Nau ƀư nơih ueh, yơn dôl njêng jêng du nau ƀư mhe mhâmna nau rêh ueh tâm ƀon lan Hoà Thịnh-Ntŭk geh ndâk rêh rjăp dăng jêh tă geh dak bŭk lơh jâk hô ngăn tâm khay 11 năm e.

Nô Nguyễn Hữu Đồng, du hê nŭih ƀon tơm ta Hoà Thịnh, du hê nŭih ntĭm mbơh ăp rmôt bu hăn tât kơl an ân kônh wa rklaih nau khuch rnôk jêh geh dak bŭk lơh khuch. Ndrel ăp nar aơ, bô ƀa ƀơ tât tâm mâp ta Mỹ Lâm gay mprơ ăp nau ma nơm ŭch ân kônh wa, băl bên nơm djăt. Đah nô, geh râng ta aơ nê lah nau rhơn, nau ueh lăng:

‘Gâp kŏ kơt lah ăp oh nê gâp mơng ri dŭt n’hâm geh nau kơl an nau kan aơ ngăn. Jêh rnôk rđau kan ƀư ăp nau aơ, gâp saơ ƀon lan nơm jêng geh nau ueh lơn; kônh wa geh kan pah, nau rêh nuih n’hâm kŏ ueh oi đŏng”.

Bah 4 pơh ndâk ƀư, bôk nau kan tâm n’ur njroh mprơ nsum mpôl tâm mâp Mỹ Lâm mro geh du hê nŭih lĕ 70 năm hôm, ma nau nteh nkren đơn bah wa ueh ngăn. Wa Phạm Duy Binh, tâm phường Tuy Hoà. Nar prao ăp pơh, păng tă bah Tuy Hoà rlet rlau âk jêt km gay tât ta Hoà Thịnh, kơl an nau ŭch rŏng bah nŭih mơng ma nau njroh mprơ đah nuih n’hâm nơm ngăn. Wa Binh nkoch:

‘Rnôk ndơn geh nau mbơh lah Hoà Thịnh ƀư tâm n’ur njroh mprơ nglau dak Mỹ Lâm, gâp, du hê nŭih blau nkre đơn guitar ndrel blau mprơ, gâp saơ nau kan aơ ueh êng ngăn. Phung hên mra râng đah nuih n’hâm ŭch n’ơr êng. Gâp saơ nau nê lah ueh ngăn”.

Êp nau tâm mâp Mỹ Lâm, ăp măng ƀư nau njroh mprơ hôm geh ƀư tâm du đê̆ ntŭk trong rlet rlau bah ăp lŏ ba. Bôk nau kan aơ geh nau râng kơl bah ăp nŭih băl mom, ŭch pơk luh nau ƀư ơm yau ueh mhe ân nŭih ƀon lan xã Hoà Thịnh. Bôk nau kan ƀư njroh mprơ nsum mpôl aơ yor wa Phương văn Lành, Bí thư Đảng uỷ xã Hoà Thịnh ntơm ndâk ndrel geh ntrŭnh tâm nuih n’hâm ŭch êng nơm.

Mô geh tăch vé ndrel geh ndâk ƀư tâm kêng măng nar prao ăp pơh. Nŭih blau nkre đơn ri nkreh đơn. Nŭih blau mprơ ri mprơ. Ndrel ntă nŭih ŭch nkoch nau dak bŭk lơh ri kŏ dơi râng đŏng. Wa Phương Văn Lành, mbơh, jêh âk nar geh ndâk ƀư nau kan “Tâm mâp Mỹ Lâm” hŏ njêng nau ueh êng ngăn:

‘Nau dơi geh bôk năp phung hên ƀư mhe rlau lĕ rgum âk ngăn bu năch tâm ndrel bah dih xã, mô lah bah n’gor êng tât râng, ndrel ma tâm n’ur đah ƀon lan ta aơ. Aơ lah du ntrong ueh ngăn gay hên dơi geh nkoch ăp nau ueh bah ƀon lan nơm đah băl bên ndrel bu năch tâ, bah dih xã kŏ kơt lah tâm ndrel bah dih n’gor”.

Ntơm blau Mỹ Lâm tât ma ndri băm dak Bầu Đá, ntơm Làng Sen tât Suối Lạnh lah ăp blah lŏ jong ngai tâm êp ma ƀon lan...hŏ njêng jêng rup gui ueh bah ƀon tơm Hoà Thịnh ueh ăng, đăp măpn, nar lơn ma rgum geh âk nŭih tât uănh, pâl ueh./.