Gay ma nchrăp an rơh lễ quốc khánh năm aơ, ăp nar ba năp ntŭk rêh jêng ta ƀon Ko Tam, nkuăl ƀon têh Buôn Ma Thuột, n’gor Dak Lak ntoh n’gôr nău nteh chĭng bâh ăp oh kon se jê̆. Ăp oh dôl geh nti, nkah tay nău chĭng lĕ geh nti gay ma hăn tâm nđur, tâm rlong ta ăp ntŭk pâl nđaih tâm ăp nar rlu. Nô Thái Quang Êban, ta ƀon Ko Tam, xã Ea Tu, nkuăl ƀon têh Buôn Ma Thuột, lah nuĭh ntĭm leo an ăp oh nti tŭch chĭng an gĭt. "Gâp ŭch mbơh tơih nău rhơn, nău ueh, ngăn lah an ăp oh jê̆, gay ma lĕ rngocoh ăp nuĭh ndrel gĭt nău chĭng, chĭng  arap, nău njroh ueh bâh ăp băl jê̆ ta ƀon Ko Tam gay ma an ăp nuĭh geh gĭt”.

Wa Y Wang Bing, nuĭh Bunong ta ƀon Lê, nkuăl têh Liên Sơn, nkuăl Lăk, n’gor Dak Lak ndrel đah rnăk wâl ƀư jay ngih sa Pai R’Lăm. Pai R’Lăm lĕ ƀư rlău 2 năm aơ n’hanh lah ntŭk wăch rgum âk năch tât ngêt sa ăp ndơ sa way ơm bah nuĭh Bunong. Ta aơ năch hôm dơi ngêt sa djăt chĭng goong n’hanh rwăt ăp ndơ cheh tanh bah nuĭh Bunong. Wa Y Wang Bing lah: “Bah aƀaơ tât 2/9 mbra dŭt âk năch. Rnăk wâl gâl lĕ nchrăp tŏng ăp hôm kơt, ndơ ngêt sa gay rhŏ an năch. Ăp ndơ dŏng way ơm kơt ndơ cheh tanh gay tăch an năm ƀư mât ndrăy. Mpôl hên lĕ tiăr ti tŭr chĭng ăp nău mprơ way ơm bah nuĭh rnoi đêt kơt mprơ, tŭr chĭng, njroh gay rhŏ an năch rnôk geh nău ŭch. Lĕ rngôch ăp ntil mbra rhŏ an năch uĕh ngăn rnôk khân pơng tât đah rnăk wâl mpôl hên”.

 Mbra kơl an năch pâl nđaih ta rơh lễ 2/9, tâm ba năp nơh, 25 nuĭh kan ndrel tâm câu lạc bộ chĭng gong xã Quảng Khê, nkuăl Dak Glong, n’gor Dak Nông, lĕ geh tiăr nti ăp nar ta dŭt pơh. Yuh H’Xanh, kruanh câu lạc bộ an gĭt, nău ƀa ƀơ nti tŭr chĭng goh gong, njroh mprơ, nuĭh Bunong ta Quảng khê mô dơn mât rbăy, n’hao nău euh êng rnoi nơm ma hôm nha geh tay nău geh ăp rơh ta ntŭk geh vơt năch pâl nđaih.  "Gâp way đă oh nô tâm ntŭk kan ndrel an geh nti ƀa ƀơ, mhâm ƀư gay ma mât nău kan aơ mô geh tăch proăt. Gay ma rnôk geh bu jă rĭ geh hăn dâl nkre ma geh prăk dŏng nkre ma kơl an oh nô geh nău kan geh mât rbăy nău ueh êng rnoi nơm đŏng".

Nchrăp mbra ntŭk tât bah năch rơh rlu lễ Quốc khánh 2/9 năm aơ, nău kan dơi kan n’hanh n’gâng kan nkuăl Kon Plông, n’gor Kon Tum dôl nsrôih nchrăp ăp ndơ khlay gay wơt năch tât đah nkual pâl nđaih sinh thái lam dak Măng Đen. Tĭng wa Đặng Đình Toán, Kruanh jro kan Văn hóa n’hanh Thông tin nkăl Kon Plông, nchrăp tâm ăp nar rlu lễ mbra geh hăng rbăn năch tât nkuăl. Ndrel đah ăp ntŭk wăch rgum ăp tơ̆ tât nkuăl, kơt: dak leng Pa Sỹ; n’glău Đăk Ke; yôk n’ho Măng Đen. mir tăm biăp, tơm sa play; ƀon pâl nđaih ntŭk gŭ rêh Vi Rơ Ngeo... di rơh rlu Quốc khánh 2/9 năm aơ, nkuăl Kon Plông hôm ƀư âk nău uĕh rhŏ an năch pâl nđaih. Wa Đặng Đình Toán, an gĭt: “Mpôl hên lĕ n’hanh dôl ƀư ăp nkô̆ nău, na nê̆ lah ăp nău ƀư nghệ thuật geh âk văn hóa way ơm bah kônh wa ta ntŭk. Ntĭt nsa mpôl hên ƀư nău văn hóa chĭng gông. Jêh nĕ boăt n’hâm kơt uh tà vẩu, ting ning. Ăp nkô̆ nău aơ yor ăp nghệ nhân ma lĕ dơi Kruanh dak an rnê nkhôm ơư. Ƀư ăpmôn thể thao way ơm kơt ntrôl mâng, dô̆t rse. Bah meng ăp nău ƀư mpeh văn hóa kơt nĕ ri UBND ăp xă tâm rgop đah Rmôt kan pâl nđaih Măng Đen n’hanh ăp doanh nghiệp, mir jay ta ntŭk mpôl hên mbra ƀư du ntŭk mpla nsơ n’hanh tăch ăp ndơ ntĭt mpơl bah nkuăl ta nkual Ntŭk ntô văn hóa Tây Nguyên gay rnôk năch tât mbra geh nău ƀư ngăn ndơ ntĭt mpơl n’hanh uĕh ngăn bah nkuăl Kon Plông”.

Rơh lễ 2/9 geh rlu jŏ nar, Gia Lai lah ntŭk tât dŭt ueh đah năch pâl nđaih gay ma geh gĭt ăp ntŭk ueh ntoh lư n’hanh tât râng ăp ntŭk mpeh pâl nđaih ntŭk rêh jêng ta ntŭk. Đah nar rlu jŏ tât 4 nar, nuĭh ƀon lan n’hanh năch mbra geh âk nău săch tât ntŭk pâl rlưn, geh gĭt ăp ntŭk ueh ta yôk prêh Gia Lai . Ăp ntŭk ntoh lư n’hanh ueh kơt lah Quảng trường tâm rnglăp, Công viên Đồng Xanh, Công viên Diên Hồng hôm nha lah nău săch ueh bôk năp bâh năch pâl nđaih tâm n’hanh bah dih n’gor yor nău  âk ueh  ăp nău kan bah dih n’hanh ăp nău pâl nđaih hăn ndrel geh âk năch tât pâl, rlưn..Rlău ma ăp ntŭk tât aơ rĭ ăp ntŭk ntoh lư êng kơt yôk Chư Đang Ya, dak bât pă điện Ialy, leng Mơ- ƀon nhup ka ta dak bât pă điện Sê San mô lah bri ngih dak mât Kon Ka Kinh...mô lah ăp ntŭk chup rup ueh bâh ăp ntŭk ngêt cà phê mhe lah ăp ntŭk tât ueh an nău săch tât pâl rlưn bâh năch rnôk tât ta nkuăl ƀon têh yôk tâm ăp nar rlu aơ. Nô Đinh A NGưi, Giadm đốc công ty TNHH Dịch vụ pâl nđaih A Ngưi ta xã Kông Lơng Khơng, nkuăl Kbang lĕ geh ƀư âk nău vơt năch ta homstay bâh nơm gay ma kơl an năch pâl nđaih. “ Nchrăp an vơt năch tât pala rlưn ta rơh rlu 2/9, A Ngưi dôl muih kuaih ueh ntŭk ntô ta homstay, pih kloh mung phôi. Nchrăp năch tât ta nkual pâl nđaih aơ klâp ma 50-100 năch. Ta rơh aơ mpôl hên geh ndơ̆ năch tât uănh pâl rlưn ăp ntŭk leng, hăn ta bri, gâm ndơ sa kơt poăch gŭch, gŭch poăch sŭr djăr đah dĭng nkar n’hanh gĭt nău văn hóa way ơm bâh ƀon lan kơt lah tŭr chĭhng, njroh xoang, peh phe, tanh cheh n’hanh nău nchrăp nĕ dôl geh ƀư ueh, mô geh nău jêr”.

Mbah rhơn nkah gĭt 78 năm Nar cách mạng Khay 8 n’hanh Quốc khánh 2/9 (1945-2023), bu ranh ƀơn Đơng Gur Ha Lơng, ta thôn Đam Pao, xă Đạ Đờn, nkuăl Lâm Hà, n’gor Lâm Đồng rhơn an gĭt, knơm geh Đảng n’hanh Ngih dak uănh mĭn ntuh kơl đah ăp ntil, ndrel đah nău wât hao êng bah kônh wa tâm ƀon, nău rêh bah nuĭh ƀon lan ntŭk aơ lĕ hơm răm, tŏng ăp. Lơn lah, bah nar dơi geh ăp bôk nău kan n’hanh ntuh kơl yor ăp bôk nău kơl rƀŏng tĭng lam dak, muh măt bah nkual rnoi mpôl đêt Đạ Đờn lĕ hun hao âk. Wăng sa đăp mpăn, nău tâm rnglăp rnoi mpôl đêt lơ mât uĕh tay, nuĭh ƀon lan ndrel ty ndâk njêng ƀon tơm lơ ndrŏng uĕh. Bu ranh ƀon Đơng Gur Ha Lơng ntô̆ n’hao, lah: “Ta thôn Đam Pao mpôl hên geh âk oh nô rnoi đêt gŭ rêh ndrel, kơt K’ho Cil, K’ho Sre, K’ho R’Yồng, nuĭh Yưan.... Yơn kônh wa geh du nuih n’hâm, tâm rnglăp ndrel hun hao ƀon lan nar lơ uĕh lơn. Kônh wa ndrel soan rgop ƀư trong, dak dŏng, ŭnh ang. Gâp lah bu ranh ƀon jêng lơ dâk rgŏ jă kônh wa ndrel soan tâm rnglăp, ndrel nău mĭn hăn ndâk njêng wăng sa bah ƀon lan, kơt nău tâm rnglăp đah ăp mpôl chroh tâm ƀon kơt chroh bap, chroh kon n’hanh phật giáo”.