Ôi 22/11, ta Bảo tàng n’gor Dak Lak ntơm pơk pla n’hơ nău dơi wăng sa – rêh jêng kon nuĭh nkhêp nkah ndray 120 năm njêng n’gor n’hanh 80 năm nar njêng tahen ƀon lan Việt Nam.

 Ƀư ntơm bah aơ tât lĕ nar 31/12, pla n’hơ way 2 nkô̆, lah “ăp nău dơi wăng sa- rêh jêng kon nuĭh bah n’gor Dak Lak lôch rlău 120 năm” n’hanh “Thác Hai- Drăp ndơ ơm yău ntlơi an tay bah meng dak me Ea Hleo”. Tâm nê, way nkô̆ ăp nău dơi wăng sa- rêh jêng kon  nuĭh pla n’hơ rlău 200 păng rup, siƀŭt ơm mpeh du bông têh jêng n’hanh hun hao bah n’gor Dak Lak rlău ăp rơh kăl e, njăr trong 80 năm rdâk njêng n’hanh têh jêng bah mpôl tahen Dak Lak. Aơ lah ndơ an saơ na nê̆, mpơl ngăn ta năp măt rnôk rdâk njêng n’gor Dak Lak, ntơm bah nkual neh bri lĭng dak rngot, ach o hŏ têh jêng dăng, jêng du n’gor hun hao geh mbơm tâm nkual Tây Nguyên n’hanh lam dak. Way nkô̆ pla n’hơ nsôch chuh lôk lŭ Thác Hai, lah drăp ndơ khlay gưl neh dak lor bôk năp bah n’gor Dak Lak dơi kơp dơn, lơn ma an saơ di tay ăp rnoh khlay mpeh âk mbâl kăl e, văn hóa tâm rnôk hun hao bah Dak Lak.