Tĭng nau mĭn bah ăp nŭih kan khoa học, trôm ntu  C3,C4 geh njêng geh tât ăp nau  pruh ŭnh bah yôk uưnh Chư Bluk bah rnôk aơ nklăp 600 rbăn năm. Trôm ntu yôk ŭnh C3, C4 geh trong mbluh, jong bơi tât 1000 m. Bar trôm ntu aơ tâm ăp trôm ntu jong bah yôk ŭnh jong ngăn tâm Đông Nam Á đah ntŭk ueh ndrel geh nau rnoh ân dơi mĭn njêng prêh.

Bah năp nê, n’gor Dak Nông hŏ ƀư nau vơt ndơn Bằng dăp rgum ntŭk nkah ơm khlay bah neh dak trôm ntu C6-1, tâm ntrong trôm ntu neh yôk ŭnh tâm Krông Nô. Trôm aơ geh ân lah ntŭk ơm ueh ngăn ngên êng du ntŭk tâm Việt Nam ndrel Đông Nam Á. Aơ mô êng lah ndơ khlay ma hôm lah du ntŭk gay dơi geh uănh tât nau ơm, ntŭk saơ nting bah âk nŭih kăl e đah âk ntil nau vay ơm bah rnôk aơ nklăp 6000 năm.

Bah nau kan lăp uănh C6-1 ndrel C6, ăp nŭih kan mêt uănh nau ơm hŏ saơ âk ndơ dŏng gay ma pah kan geh ƀư đah lŭ ndrel ndơ mon ma uk, nting mpa bri, ăp ndơ dŏng êng, têl ŭnh năk. Ngăn lah nau saơ 3 ntŭk môch leo tâp, nting bah 10 nŭih bah jŏ kăl e. Nua ma rơh bôk năp geh joi saơ nting bah nŭih ơm kăl e tâm ăp trôm ntu yôk ŭnh lah nau saơ geh tât nau khlay bah ntŭk kan joi ndơ ơm.

Bôk năm aơ, nkuăl Cư Jut n’gor Dak Nông ƀư nau vơt dơn Bằng dăp rgum ăp ntŭk ndơ ơm yau đah ntŭk ơm ueh bah yôk ŭnh Băng Mo, ta tổ dân phố 4, nkuăl têh Ra T’ling. Tĭng nau uănh mĭn bah ăp nŭih kan khoa học, tâm ntŭk Công viên địa chất lam ntur neh UNESCO Dak Nông geh đê̆ ngăn 5 ntŭk trôm ntu yô ŭnh bruh, geh: Yôk ŭnh nâm B’lang, yôk ŭnh Nâm Ka, yôk ŭnh Nâm Gle, nkuăl Krông Nô, yôk ŭnh Nâm Dơng ndrel yôk ŭnh Băng Mo, nkuăl Cư Jut.

Yôk ŭng Băng Mo ueh ngăn. Yôk aơ kơt lah nchop đon, rđŭng tâm nklang, mbung trôm kơt rup oval, tâm mbung têh, lăp huyêt ndrel geh ăp ntrong trôm tâm ban ma nau leo pruh tơm. Ntŭk aơ dĭng lĕ nkualư geh mât nklăp 13 ha.

Nau ma âk ntŭk geh kơp dơn ntŭk ơm ueh, ntŭk ơm bah n’gor lah nhoat ƀư ueh ngăn, rgop nau mât ndrel ƀư ueh nau khlay bah neh ntu, âk ntil sinh học bah Công viên đại chất lam ntur neh UNESCO Dak Nông. Ntơm bah nê ntrŭt dăng nau rgum tơm ntuh kơl lăp tâm nau dŏng nâp ueh bah ntŭk ntu, ndâk ăp ndơ pâl n’aih ueh, rgop nau leo hun hao văng sa, rêh jêng, n’hao nau rêh bah nŭih ƀon lan./.