Măng 16/8, ta ntŭk kan Văn hoá n’gor Dak Lak, Tổng lãnh sự quán Ấn Độ ta Nkuăl ƀon têh Hồ Chí Minh tâm rgop nsum ma n’gor Dak Lak ƀư Bôk nau kan njroh nau ơm Ấn Độ-Kuchipudi. Aơ lah nau kan tâm bôk nau ƀư Lễ hội Mbah Việt Nam năm 2023 bah Ntŭk kan ntoh măt bah Ấn Độ tâm nkual ƀon têh Hồ Chí Minh, tâm n’ur nau ơm đah Ấn Độ ndrel n’gor Dak Lak. Tâm nau kan, ăp nŭih geh uănh ăp nau njroh ueh ndrel ăp ntil nau vay ơm bah Ấn Độ yor rmôt njroh Kuchipudi geh 6 nŭih blau ngăn bah Ấn Độ tât. Nau njroh ntơm đah du đê̆ nau vay ƀư tâm sân khấu, jêh nê ăp nŭih mra nkoch mbơh mpeh săk nơm đah nkô̆ nau bah lôch nau mprơ ndrel nau njroh nkoch nau bah săk nơm đah ăp ntil.

Ăp nau mprơ nau njroh kơt lah nau nkoch bah ơm, rnê tât du hê Brah tâm nau tĭng chroh bah Ấn Độ kơt: Brah bôk rveh Ghanesha, brah Shiva, Brah Rama, brah Vishmu, brah Krishna. Dah ăp nau njroh ueh, ăp nau njroh mprơ kơl nŭih uănh ndơn saơ ndrel gĭt tay tât nau ơm yau bah neh dak Ấn Độ. Wa Mahesh Giri, Rđau kan ntoh măt gŭ kan bah Ấn Độ ta nkuăl ƀon têh Hồ Chí Minh mbơh:

‘Hên hên pơk hvi mô êng knŭng nau tâm boh bar ding ma hôm n’ăp nau tâm boh ƀư nau kan tăch rgâl ndrel nau tâm boh văn hoá, nau aơ khlay lơn. Nê lah nkô̆ nau mhâm ƀư hên ta aơ ndrel mra lŏ ƀư tâm nchră ăp bôk nau kan aơ. Nau aơ njêng ăp nau tâm boh gưl n’gor tâm nau tâm boh bah nơm, mra kơl an nau tâm boh bah nơm jêng nau tâm dăch. Ấn Độ ndrel Việt Nam geh nau tâm boh tâm dăch ndrel đêp rmên, ndri ma phung hên ŭch n’hao prêh lơn tay nau tâm boh aơ./.