Nar dja đah aƀaơ 22 năm (nar 01/7/2001), Bôk ntuh nău ngơi K’Ho, mpeh Ban Dân tộc (VOV4), Radio nău ngơi Việt Nam ntơm pơk ƀoh ngăn. Ntơm bah nê tât aƀaơ, nău ngơi dơi ƀư luh n’hanh pơk ƀoh mbro ăp nar ta Nhih pah kan way gŭ kan bah Radio nău ngơi Việt Nam ta nkual Tây Nguyên, jêng nuĭh băl dêh bên bah nuĭh K’Ho.

          Hŏ jêng nău way bên, ăp ôi dâk kah bĭch, nău lor bôk năp bah wa Kơ Să Ha Nhiếu (ta xã Phú Hội, nkuâl Đức Trọng, n’gor Lâm Đồng) lah pơk joi gay djăt nău ngơi K’Ho bah Radio nău ngơi Việt Nam, tă bah nhih pah kan way gŭ ta Tây Nguyên ƀư. Păng nkoch: Rlău 20 năm aơ, nău ngơi K’Ho bah Radio nău ngơi Việt Nam hŏ jêng băl dêh bên. Tĭng bâr ngơi bah ăp biên tập viên hŏ jêng dêh bên. Yor  kơt nê̆, păng nkah kloh tĭng nkô̆ tĭng nău way nkoch n’hanh mông pơk ăp nar n’hanh tâm pơh. Tâm nê, păng dŭt nkah đah mông pơk nău mprơ, ntĭm nti trong pah kan jan sa, ntĭm nti druh ndăm jăp gơih wăng sa.

“Gâp saơ ăp nău nkoch ngơi ta Radio dŭt uĕh. Way ntĭm nti kônh wa trong pah kan jan sa, mpât mprơ, mprơ tòng bơr kơt bu mprơ Ka Ding. Geh âk nău mpât mprơ ntrŭt nsôr kônh wa jăp gơih wăng sa, ân gĭt tăk sah tanh dông. Gâp dŭt ŭch ăp nkô̆ nău dja dơi pơk ƀoh âk gay kônh wa djăt n’hanh ntơm bah nê kơl n’hao nău gĭt êng”.

Đah wa Cil Bri, Groi kruanh Hội Liên hiệp bu ur n’gor Lâm Đồng, nău ngơi K’Ho bah Radio nău ngơi Việt Nam lah nău nkoch lư tơm bah Ngih dak. Mô dơn nkoch ngăch nău lư tâm dak n’hanh dak bah dih, ma hôm nkoch ngăch nô nău mhe lư ta nkual Tây Nguyên lah nsum n’hanh Lâm Đồng lah êng đŏng. Tĭng wa Cil Bri, ăp nkô̆ dơi nđơn nkoch ma nău ngơi n’hanh chữ nchih bah nuĭh K’Ho ta n’gâng  ƀoh tâm ban kơt trang web VOV4.K’Ho bah VOV Tây Nguyên, hŏ kơl kônh wa tât dơi du trong nchrăp lor n’hanh năn ngăch.

“Gâp dŭt ŭch djăt nău ngơi K’Ho bah Radio nău ngơi Việt Nam way gŭ kan ta nkual Tây Nguyên. Yor ta aơ geh dŭt âk nău nchih nkoch mpeh văn hoá, chính trị, wăng sa- rêh jêng kon nuĭh, mât ndray văn hoá, ntĭm nti oh yuh deh đêt kon, tâm ban kơt trong mât chăm ntĭm nti oh kon jăp gơih wăng sa, rvê hăn kơt nti, ntĭm nti chuh n’gang vaccine ăp tŏng, gâp saơ ăp nău nê dŭt uĕh đah pah kan way kan bah gâp…”.

Đah bu mprơ ntoh lư K’Brèm, aƀaơ dôl pah kan ta Trung tâm Văn hoá, Thông tin n’hanh Thể thao nkuâl Bảo Lâm, n’gor Lâm Đồng, nău ngơi K’Ho bah Radio nău ngơi Việt Nam kơi ntop tơm văn hóa way ơm bah rnoi nuĭh he. Yor ma ăp nkô̆ way nkoch “Nău mpât mprơ Tây Nguyên”, “Nău mprơ 3 mpeh”, “Tâm tŭa nău mprơ” bah Radio nău ngơi Việt Nam, Bu mprơ ntoh lư K’Brèm geh tay tơm ndơ gay rhŏ dŏng an pah kan way kan văn hoá ta ntŭk. Nkhêp nkah ndray 22 năm pơk nău ngơi K’Ho bah Radio nău ngơi Việt Nam. Bu mprơ ntoh lư K’Brèm, njuăl nău mbah rhơn dŭt n’hâm:

“Nkhêp nkah ndray 22 năm, gâp dăn mbah rhơn Radio he way ngăch dăng mbro, hăn jŭr âk tâm dâng gay rgum nchih ăp văn hoá way ơm uĕh lăng bah u che he. Mô dơn êng ăp nău mpât mprơ kơt đơs ting đơs loong, mprơ tâm pât, kồng yai bah nuĭh K’Ho- Mạ, gâp ŭch rŏng lĕ rngôch kônh wa ăp ƀon lan ndrel nđơn mât ndray tay rup uĕh way ơm mpêt khlay bah u che he”.

Di 22 năm pơk ƀoh nău ngơi, ăp nuĭh ƀư nău ngơi K’Ho bah Radio nău ngơi Việt Nam geh âk nău nkah rhơn. Lĕ rngôch ăp nuĭh rgum nchih, rblang nău, nuĭh rŏ ngơi ntoh bah ăp ƀon lan bah n’gor Lâm Đồng da dê, tât đah Nhih pah kan Radio nău ngơi Việt Nam way gŭ kan ta Nkual Tây Nguyên (nhih pah kan gŭ ta nkual ƀon têh Buôn Ma Thuột, Dak Lak) gay tĭng ƀư nău dơn kan têh khlay dja. Rlău 20 năm krêp dêh đah nău ngơi, ăp biên tập viên mô dơn mpơl uĕh pah kan nchih rblang, rŏ ma nău ngơi me deh he nơm ta n’gâng ƀoh nău ngơi, ma hôm geh ăp rơh hăn pah kan tât ăp ƀon lan nkual jru, nkual ngai, mâp băl djăt radio, rgum nchih mpât mprơ n’hanh tĭng ƀư ăp nău nchih, rgum nchră nkoch bri geh n’hâm n’hôr nău rêh. Wa K’Brọp, Groi Jrô kan Nău ngơi rnoi mpôl đê̆, Nhih pah kan way gŭ ta nkual Tây Nguyên (Kruanh rmôt ơm nău ngơi K’Ho) mpơl nău:

Rlău 22 năm krêp dêh ndrel hăn đah nău ngơi K’Ho, 7 năm lah Groi Kruanh Jrô kan rnoi mpôl đê̆, bol ta ah ntŭk gŭ kan, bol dah têh kan, gâp nsrôih ƀư lôch jêh uĕh nău kan dơi jao. Nkhêp nkah ndray 22 năm Nar pơk ƀoh nău ngơi lor bôk năp ma nău ngơi K’Ho, gâp dăn an lĕ rngôch oh yuh nô biên tập viên ƀư rblang nău ngơi K’Ho n’hâm suan ngăch lăng dăng soih, nâp dăng mpeh chính trị, tâng jru mpeh nău kan, lah ntung njŏ nkoch trêng tay trong kơl bah Đảng n’hanh Nhih dak tât kônh wa nuĭh K’Ho ma nău ngơi me deh bah he nơm, rgop mât ndray tơm văn hoá way ơm bah nuĭh K’Ho ma trong pơk ƀoh nău ngơi n’hanh trang web ta internet, gay nău ngơi K’ho mbro lah ndơ djăt mô dơi lah mô geh ăp nar n’hanh dêh bên bah ƀon lan nuĭh K’Ho”.

22 năm aơ, Nău ngơi K’Ho ndrel đah 5 ntil nău ngơi rnoi mpôl đê̆ êng ƀa ƀă ta nkual Tây Nguyên, lah: Rđe, Jarai, Bana, Xơ Đăng n’hanh Bu Nong way mât nuih n’hâm tâm rnglăp, ndrel tĭng ƀư jăp nău dơn kan nkoch trêng trong nchrăp, gung trong bah Đảng n’hanh Ngih dak tât đah kônh wa ƀon lan nuĭh rnoi mpôl đê̆. Nău ngơi K’Ho way lah nuĭh băl dêh bên bah ƀon lan Tây Nguyên./.