Tâm ngih jong bah rnăk nô Y Wôn Knul (Ama Nhiên) ƀon Akŏ Dhông, nkuăl ƀon têh Buôn Ma Thuột, rmôt bu ndăm geh bơi tât 10 nŭih dôl ma tâm ntĭm nti nau ƀư tur chĭng, goih dĭng, jêh nê lŏ gloh đơn T’rưng, jŏ ma nê lŏ uh n’hôm ndrel mprơ đŏng. Nô Y Wôn Knul mbơh, nar lơn ma geh âk ngăn bu năch tât đah Nkuăl ƀon têh Buôn Ma Thuột, bu ŭch djăt nau njroh mprơ, joi gĭt ăp nau vay ơm bah rnoi Rđe. Ngăn lah, tâm ăp rnôk lễ hội cà phê êp tât, rmôt khân păng mra ƀư nau kan pâl n’aih, ndơn âk tŏ bu năch tât gay ma uănh tâm ngih nơm đŏng:

 ‘Nchrăp ân lễ hội ri oh nô hên kŏ geh âk nar gay ma tâm nkoch bri, tâm ntĭm nti nau tur chĭng mô lah goh, uh ăp ntil ndơ đŏng, jêh nê ntĭm tay nau mprơ, nau nkoch, jêh nê lŏ uănh nkra ƀư ueh ăp ntil ndơ ơm geh bah ndơ goh, mpeh nau chĭng lah nsum kơt lah chĭng, đơn T’rưng, đing buốt, đinh năm, nau mprơ Kưt aơ đŏng gay ma păng geh nau di, nau blau ueh lơn, ân nơm geh nau mbơh, nkoch ăp nau nơm ryơk mpeh nau ơm bah nơm ndrel nơm kŏ ryơk ăp nŭih bu tât djăt mpeh nau nê đŏng”.

Lah ntŭk tât pâl n’aih ơm ueh tâm nkuăl ƀon têh Buôn Ma Thuột, ăp nar aơ, ƀon Akŏ Dhông dôl geh ƀư ueh tay đah ăp ntil gay ma kơl an ăp nau kan bah lễ hội. Ndrel đah nau nchrăp ăp ntŭk ngih gŭ ndrel ăp ntil ndơ gay ma gâm tăch, sa, ăp nŭih ăp rnăk tâm ƀon hôm nchrăp ndrăp ueh ngih vâl, nchrăp ƀư kloh, ueh ăp mpông trong lăp, ntŭk nkoch mbơh, ntŭk ntĭm trong gay ma năch nơih lơn tâm rnôk hăn uănh, hăn pâl tâm ƀon nơm. Yuh H’Tít Aliô, tâm ƀon Ako Dhông nkoch, rnăk khân păng dŏng bơi tât 400 rkeh prăk gay ma nkra ân ueh tay ngih nơm, mra kơl an nau vơt năch tât rnôk geh âk nŭih bu tât hăn pâl, uănh, ngêt sa. Yuh H’Tít Aliô nkoch:

‘Yan lễ hội aơ păng geh tât mô êng knŭng lah cà phê ma păng hôm geh tât ăp nau ơm yau bah rnoi rđe nơm tâm Buôn Ma Thuột đŏng, ri ma ƀon lan nơm rhơn ndrel kâp rnơm ngăn. Gâp saơ lah ƀon lan hên ta aơ geh nau ƀư kan rjăp, dôl ma tâm kơl, tâm nchrăp ăp ntil ngăn gay ma kơl an ân rnôk ƀư Festival cà phê rnôk aơ đŏng. Tâm ƀon ri geh ăp rnăk kơt lah Ay Ray, Tăng Bi, ntŭk tăch cà phê A Rul, ntŭk tăch cà phê Ako Dhông bu kŏ nchrăp ăp nau kan njăch ndăn ân nau ƀư Festival rnôk aơ đŏng”.

Tâm ăp ƀon lan tâm n’gor Dak Lak, nŭih ƀon lan nchrăp âk nkô̆ nau gay ma ƀư kơt tĭng, ƀư ueh tay nau ơm yau bah lễ hội cà phê, kơt lah ƀư Nar rgum nau vay ơm, nau tâm rlong thể thao, ƀư ăp nau ôp brah tĭng kơt nau ơm kơt lah ôp brah ndrâm dak, ôp brah n’hâm soan, nau ƀư tâm rlong ueh bah rveh, ôp brah ân ueh...Tĭng nô Y Thiên Adrơng, tơm du rmôt ƀư nau kan pâl n’aih tâm nkuăl ƀon têh Buôn Ma Thuột, nô hŏ nchrăp nkra ân du nau ƀư pâl n’aih geh tâm di ngăn bah ƀon lan ơm gay ma bu năch tât uănh, tât râng nau ơm ueh, tâm mâp nkra ma ƀon lan nơm, nŭih ƀư ƀư nau ơm bah ăp ƀon lan.

“Nsing tâm nkô̆ nau bah ăp nau kan ƀư Lễ hội cà phê ri mra geh ăp nau kan tâm Buôn Ma Thuột, nau kan tâm Lắc ndrel nau kan tâm Buôn Đôn. Ăp nkuăl mra geh ăp nau ueh êng, tĭng ăp ntrong ƀư ma bu năch hăn ri nơm mra lơi ân năch geh nau tâm mâp, tâm n’ur, geh nau gĭt mpeh nau rêh kon nŭih, nau ueh bah nuih n’hâm, ăp nau ueh tâm ăp nkuăl bah ăp rnoi, ăp ƀon lan. Nơm hôm ƀư nau nthoi tay đah ăp nŭih ƀon lan bu dôl ma rêh tâm nê, gay khân păng ndrel tâm nkoch, ndrel ngơi, mbơh nau kan bah nơm ân năch”.

Lễ hội cà phê Buôn Ma Thuột tal 8 aơ geh âk nŭih tâm Dak Lak kâp rnơm. Tâm nau khuh n’gôr bah lễ hội ndrel nau ueh ơm bah “Khay pe Tây Nguyên”, ăp ƀon lan hŏ nchrăp tâm rnglăp nsum gay ma njêng du rnôk ƀư lễ hội geh ăp ntil mpeh cà phê ndrel âk ntil mpeh nau ơm yau êng êng./.