Măng 21/12, Sở Văn hoá, Thể thao ndrel pâl n’aih n’gor Dak Lak ƀư rƀŭn lôch nau kan tâm n’ur Chĭng gong ndrel ndơ doh nteh rnoi mpôl tâm n’gor Dak Lak năm 2025, lôch ăp nar rƀŭn nau ơm têh ngăn bah nsum mpôl ăp rnoi tâm n’gor. Jêh 3 nar ƀư khuh n’gôr, nau rgum tâm n’ur geh rlau 800 nŭih tă bah 26 xã, phường, tâm lam n’gor Dak Lak, ntoh măt ân 9 rnoi mpôl, geh: Rđe, Bunong, Jrai, Bahnar, Xê đăng, Bru Vân Kiều, Mường, Tày, Nùng. Ăp rmôt râng ƀư tâm 5 nkô̆: Tur chĭng, goh, nkeh ăp ntil đơn, mprơ, njroh ndrel ndâk ƀư ăp nau vay ơm, đah rlau 100 nau ƀư geh nau ueh bah n’gor. Âk nau ƀư op bah geh ndâk nkra tay, kơt: Nau ôp brah hao ngih mhe, luh moh săk, lih săk hao rêh, njưh n’gâng njuh, ôp brah ƀon...ndrel âk nau njroh mprơ, tur chĭng êng êng dơi geh ăp mrôt ƀư đah âk nau ueh, nau mhe. Tĭng Rnâng kan ƀư nau kan, ăp rmôt geh nau nchrăp ueh, rjăp.

Âk nau njroh mprơ, tur chĭng geh ndâk ƀư blau, yơn hôm tâm dăch ma nau khlay geh ơm yau, ntpoh nau dơi ƀư tơm bah ăp rmôt ƀư nau kan tâm rnôk mât ndrel ƀư ueh nau ơm yau khlay bah chĭng gong ơm ndrel ăp ndơ goh nteh bah rnoi mpôl. NSND Bùi Thanh Hải, rmôt ƀư nau kan uănh nălnau dơi, kơp dơn:

 ‘Ăp rmôt râng rnôk aơ geh âk ntil ngăn ndrel nau ƀư ueh đŏng. Tâm nkô̆ nau ƀư ăp nau ôp brah, lih săk ƀư nau ơm ri kơt lah hôm mât nâm ơm nau dơi tă bah jŏ. Êp nê, geh ăp nau dơi geh ƀư n’hao jêng mhe, nrjoh mprơ kŏ geh kơt nê đŏng, n’ăp ma nau kan geh nklă êng tâm rnôk tủ chĭng, nkreh đơn, uh goh, geh ăp ntil ndơ ueh ndrel mhe. Ndrel ngăn lah gâp saơ êng ăp nŭih ƀư râng ăp nau kan aơ, ri ăp bu ranh âk năm, hôm geh râng dŭt n’hâm n’ơr ngăn ndrel ƀư nau kan ueh nâm ơm.

 Ri du đê̆ rơh băl mom kŏ gơih ndrel ŭch ndrel geh ăp kon se hôm jê̆ ma kŏ râng ƀư ndrel mât ăp nau ơm ueh aơ rjăp ngăn đŏng”.

Lôch nau ƀư tâm n’ur, Rnâng kan ƀư nau pă nkhôm 8 nau nkhôm ân dĭng lĕ rmôt ân ăp nŭih, ăp ntŭk geh nau dơi ueh, rnê nkhôm ân 37 nau njroh mprơ ueh. Rmôt nŭih hăn râng rlong tă bah xã Liên Sơn Lăk geh nau dơi giải Nhất dĭng lĕ tâm rnôk tâm rlong./.