Ntơm bah năm aơ, Lễ hội Sầu riêng Krông Pắc mbra dơi n’hao jêng Lễ hội Sầu riêng n’gor Dak Lak. Nkô̆ dja hŏ dơi UBND n’gor Dak Lak tâm ban ŭch nsing ta nău n’glôch jêh bah Ban Thường vụ Tỉnh ủy, lôch rnôk mĭn uănh ăp nău dơi ntoh lư bah ăp rơh lễ hội bah năp nơh. Tĭng trong rƀŏng mhe, Lễ hội Sầu riêng n’gor Dak Lak mbra dơi ƀư têh gưl n’gor, tât leh 2 năm/tơ̆.

Nchrăp, lễ hội lor bôk năp ta gưl n’gor mbra dơi ƀư tâm năm aơ, lah nar kan rgum nkre âk ntil ndơ ƀư, nkre đah tuch tăm, văn hóa n’hanh pâl nđaih. Lễ hội mbra geh âk nău kan, kơt: hội chợ ndơ tuch tăm, tâm rlong kah play, n’hoch hăn ndeh kao, nchreng an uănh njroh mprơ way ơm, nkơnh n’hơ pâl nđaih, nkre đah buăt nthoi tăch ndơ tuch tăm…Tĭng Sở Văn hóa, Thể thao n’hanh Pâl nđaih n’gor Dak Lak, n’gor dôl rdâk njêng trong nchrăp hun hao na nê̆ an Lễ hội Sầu riêng, đah ntrŏng năl lah ntŭk rgum tơm tâm rêng kan pâl nđaih quý 3 năm aơ, lơn lah tâm rnôk rlu lễ Quốc khánh 2/9.