Nar 22/6, N’gâng kan Văn hóa-Thể thao n’hanh Pâl nđaih Dak Lak ƀư 2 jrô ntĭm mprơ ot ndrong, mprơ ngơi nău bah nuĭh Êđê ta nkuăl Cư M’gar. Na nê̆, jrô ntĭm mprơ ot ndrong, geh 20 nuĭh nti nuĭh Êđê dôl gŭ rêh ta xă Ea Tul râng. Jrô ntĭm mprơ ngơi nău geh 25 nuĭh nti nuĭh Êđê gŭ rêh ta xă Cuôr Dăng râng.

Tâm 2 khay, nuĭh nti dơi ăp nghệ nhân pă an, năp ăp nău gĭt blău bôk năp mpeh ot ndrong, mprơ ngơi nău, nghệ thuật mprơ ot ndrong, mprơ ngơi nău bah nuĭh Êđê. Nkoch du đêt nău ot ndrong, mprơ đah nău ngơi dơi trêng ntĭm n’hanh dŏng âk aƀaơ. Ndrel đah nĕ, N’gâng kan Văn hóa-Thể thao n’hanh pâl nđaih hôm an 1 bôr chĭng n’hanh kho ao Êđê an du đêt ƀon tâm 2 xă. Ƀư rgum joi n’hanh nchih, ƀư ndrôm sam ƀŭt nău ngơi mprơ gay mât ndrăy n’hanh ƀư uĕh nău khlay tâm ăp năm bah năp tay.