VOV4.M’nông –  Nar 25/8, ta xă Đăk Phơi, nkuăl Lắk, N’gâng kan Văn hóa-Thể thao n’hanh Pâl nđaih n’gor Dak Lak tâm rgop đah Jrô kan Văn hóa- thông tin Lắk n’hanh UBND xă Đăk Phơi ƀư rdâk njêng tay nău njêng oh nô bah nuĭh Bunong Gar. Aơ lah ngoăy tâm ăp nău ƀư tâm trôm nău nchrăp ƀư “Mât ndrăy n’hanh ƀư uĕh tay nău khlay văn hóa chĭng gông ta n’gor Dak Lak” yor Ntŭk kan ndrel lam ntŭr neh n’gor Jeollabuk-do, Hàn Quốc ntop kơl.

Nuĭh kuăl brah an 2 hê njêng oh nô

Nău ƀư dơi ƀư ta ngih wa Y Thiêng Cil ta ƀon Jiê Yuk, xă Đăk Phơi, nkuăl Lắk, n’gor Dak Lak, ndâk njêng oh nô  đah wa Y Nam Pan Ting gŭ ndrel ƀon.

Tĭng nĕ, wa Y Thiêng Cil n’hanh wa Y Nam Pan Ting lah băl bên uĕh tâm âk năm bah năp. nău dơi ƀư rlău 5 gưl, đah 2 nău khlay lah ƀư wât săk, mbơh đah brah yang mpeh nău tâm njêng đah 2 rnăk wâl n’hanh nău ƀư ngêt sa nsum đah 2 rnăk wâl dơi njêng oh nô.

Sông sa nsum bah 2 rnăk wâl dơi njêng oh nô đah nău uănh bah ăp nuĭh.

Tâm rnôk ƀư, nteh chĭng Bor n’gôr răm, ăp bu ur bu klô njroh mprơ rhơn n’hanh uănh nău njêng oh nô đah 2 rnăk wâl. Jêh nău ƀư aơ, bah mô nsum rnoi mpôl mô geh tâm yău ye, 2 rnăk wâl jêng oh nô du jay, geh nău tâm mât tâm mơh, tâm kơl ndrel rnôk jêr jŏt, nău mô uĕh mô lăng mô tâm kơp.

Nuĭh rlang: Y Sưng Phê Ja