Bah ôi ơm, nkual jrô kan văn hóa n’hanh thông tin nkuăl Ea Hleo, n’gor Dak Lak lĕ dŭt âk răm m’ak. Tă ƀư dơi pă ta ăp nkual êng êng kơt: nkual mpla nsơ ntŭk ntô ndrôm sam ƀŭt n’hanh ndơ STEM, nkual mpla nsơ rup nghệ thuật tĭng bôk nău, nkual ƀư ngăn mĭn joi ndrôm sam ƀŭt n’hanh văn hóa răk, tâm nđŭr nkoch tác giả tác phẩm n’hanh rgum tâm rlong nkoch nău tĭng ndrôm sam ƀŭt. Ăp nkual wăch rgum dŭt âk kon hŏk n’hanh n’ăp nai, me bơ̆ râng, uănh nđôi. Gơih nđơr djôt nklâm ndơ mhe geh geh, oh Bùi Trần Bảo Thư, kon hŏk jrô 6A5, ngih sam ƀŭt THCS Lê Quý Đôn, nkuăl têh Ea Drăng, nkuăl Ea Hleo nkoch:

“Bah ôi tât aƀaơ oh râng uănh njroh mprơ, dơn ndrôm sam ƀŭt, tâm nđŭr đah kônh yơ nuĭh nchih văn, n’hanh pâl rlưn, mĭn joi văn hóa răk. Tâm ăp nău ƀư ri oh ŭch ngăn lah pâl rlưn, ƀư ngăn văn hóa yor geh âk nău uĕh, đah ăp tay. Oh ŭch ngih sam ƀŭt ƀư âk nău khlay n’hanh pâl rlưn an ăp băl pâl rmôt gay geh tay nău wât n’hanh răm m’ak”.

Mô knŭng dơi ƀư ngăn ăp nău ƀư răm m’ak, uĕh lăng, ăp kon hŏk râng bôk nău kan hôm dơi ăp ndrôm sam ƀŭt văn học nghệ thuật an kon se. Ăp nkô̆ nău nkoch ăp năch jă râng kơl kon hŏk wât lơn mpeh nău khlay bah nău răk ndrôm sam ƀŭt, bah nĕ ăp oh geh nău ŭch lơn đah nău răk n’hanh mĭn joi gĭt tă bah ndrôm sam ƀŭt. Oh Phan Thị Phương Thúy, kon hŏk jrô 9A, Ngih sam ƀŭt PTDT nội trú nkuăl Ea Hleo nkoch:

“Oh djăt ăp nuĭh nchih thơ, nchih văn ntoh ngơi dŭt uĕh n’hanh saơ ŭch ngăn ăp kônh yơ nĕ. Geh âk rmôt lah uĕh, nkoch nău Wa Hồ dŭt rngot. Oh saơ nkre ŭch ma nkre ŭch nơm dơi kơt nĕ đŏng. Oh đêt geh răk ndrôm sam ƀŭt yor mô ŭch ngăn, dŭt âk oh răk ndrôm sam ƀŭt tâm lý hôm ndrôm sam ƀŭt văn học ri oh dŭt đêt răk. Yơn aƀaơ djăt ăp kônh wa nkoch ri oh saơ geh nău ŭch nđơrlơn, saơ ŭch ndrôm sam ƀŭt lơn n’hanh ŭch nău ngơi văn lơn”.

Tĭng wa Nguyễn Huy Dũng, Kruanh jrô kan Văn hoa thông tin nkuăl Ea Hleo, rƀŏng tĭng nar ndrôm sam ƀŭt n’hanh văn hoa răk năm 2023, nkuăl lĕ geh trong chrăp mbơh ƀư ndrel âk nău kan. Ntoh lư kơt: ntơm ƀư Nar hội đah bôk nău “Ndrôm sam ƀŭt n’hanh druh ndăm”; mpla nsơ, rhŏ an băl răk 2.500 ndrôm sam ƀŭt đah âk ntil kơt: Ndrôm sam ƀŭt văn học thiếu nhi, ndrôm sam ƀŭt khoa học thường thức, ndrôm sam ƀŭt tham khảo; ndrôm sam ƀŭt kỹ năng sống, ndrôm sam ƀŭt khoa học kỹ thuật, pháp luật, y học, tạp chí, ndrôm sam ƀŭt báo. Mpla nsơ rup nghệ thuật n’hanh rup vẽ “Ea Hleo rom uĕh”; Ƀư ăp nău pâl rlưn way ơm; tâm nchroh răm geh ndơ nkhôm; tâm nđŭr đah ăp nuĭh nchih văn, nuĭh thơ; tâm rlong nkoch nău tĭng ndrôm sam ƀŭt,... Bôk nău kan lĕ dơn geh nău uănh tât, râng bah bơi 1.000 nuĭh kon hŏk n’hanh nai ta ăp ngih sam ƀŭt THCS, THPT tâm lam nkuăl. Ndrel đah nĕ, nkuăl uănh tât ăp kon hŏk nkual jêr jŏt đah âk bôk nău kan rgŏ jă tâm rlong, rêng hvi văn hóa răk ta ăp ntŭk ngih sam ƀŭt. Wa Nguyễn Huy Dũng an gĭt:

“Mpôl hên geh trong nchrăp lah rêng hvi mpeh ăp ngih sam ƀŭt, jêh nĕ ăp ntŭk, tâm nĕ geh an ndrôm sam ƀŭt an ăp thư viện kơt rgop ndrôm sam ƀŭt jêh nĕ an ăp mon geh nău rêh jêr jŏt ri pơng mbra jong lôch tâm khay 4 aơ n’hanh ăp năm bah kơi tay”.

Ndơ̆ ndrôm sam ƀŭt tât ty kon hŏk nkual jru ngai lah ngoăy tâm âk nău ƀư ntoh lư bah Hội Văn học nghệ thuật Dak Lak rƀŏng tĭng Nar ndrôm sam ƀŭt n’hanh văn hóa năm aơ. Wa Niê Thanh mai, Kruanh Hội an gĭt, ndơn kan bah Hội Nhà văn Việt Nam, Hội Văn học Nghệ thuật Dak lak lĕ an rhiăng ndrôm sam ƀŭt văn học nghệ thuật tâm nău nchrăp ƀư “An ndrôm sam ƀŭt văn học nghệ thuật an kon se nkual jru ngai” n’hanh ƀư âk nău tâm nđŭr, tâm rgop đah nuĭh nchih ndrôm sam ƀŭt. Wa Niê Thanh Mai mpŏng, tă bah nĕ kon hŏk geh nău gĭt dăch lơn n’hanh âk lơn đah ndrôm sam ƀŭt, bah nĕ mbr an âk mông nar lơn an nău răk, mĭn joi ăp plơk ndrôm sam ƀŭt.

“Ndơ̆ ndrôm sam ƀŭt tât đah nkual jru ngai n’hanh geh âk nău ƀư an ndrôm sam ƀŭt kơt ăp nău ƀư gay rêng hvi đah nău rŏng, đah ndrôm sam ƀŭt đah kon hŏk ta nkual jru ngai. Lơn lah năm aơ đah nău nchrăp ƀư an kon se nkual jru ngai, nkual rnoi mpôl đêt ri Hội Nhà văn Việt Nam lĕ njuăl 4.000 ndrôm sam ƀŭt lăp Dak Lak n’hanh ndrel đah Hội Văn học Nghệ thuật Dak Lak lĕ tât ăp ngih sam ƀŭt ta âk nkuăl, lơn lah rƀŏng tât mpeh ăp ngih sam ƀŭt ta ăp ƀon ma geh kon hŏk rnoi mpôl đêt”.

Mô knŭng tâm rnôk rƀŏng tĭng Nar ndrôm sam ƀŭt n’hanh văn hóa răk, nău ndơ̆ ndrôm sam ƀŭt tât tĭng ngih sam ƀŭt, ngăn lah ăp ngih sam ƀŭt ta nkual jru ngai dôl dơi âk ntŭk kan ta Dak Lak mbơh ƀư tă bah ăp bôk nău kan kơt thư viện ăp ntŭk, Mpoh ang gĭt blău, Ngih sam ƀŭt cầu vòng. Tă bah nĕ rƀŏng tât nău ŭch ntrŭt nsôr n’hanh hun hao văn háo răk tâm ntŭk gŭ rêh, ndâk njêng nău bên răk ndrôm sam ƀŭt, rgop hun hao văn hóa răk nar lơ săk rnglăy n’hanh ngăn ngên.