Ôi (20/6), N’gâng kan Văn hóa-Thể thao n’hanh Pâl nđaih Dak Lak ƀư jrô tiăr nti gĭt blău ndâk njêng n’hanh hun hao ndơ pâl nđaih ta ntŭk. Râng jrô tiăr nti geh rlău 50 nuĭh lah ăp nuĭh pah kan pâl nđaih ta ăp nkual pâl nđaih, ntŭk rlu rlău homestay, ăp rnăk ntuh kơl hun hao pâl nđaih lŏ mir, ntŭk mât rong.

Jrô tiăr nti gay ntop kơl, nta an rmôt pah kan tâm nău kan pâl nđaih n’hao nău blău mpeh ndâk njêng ndơ pâl nđaih ntĭt mpơl êng; rgop nta âk ndơ pâl nđaih uĕh, mhe, tâm di an wăch rgum năch tât đah Dak Lak. Wa Nguyễn Thụy Phương Hiếu, Groi giám đốc N’gâng kan Văn hóa-Thể thao n’hanh Pâl nđaih Dak Lak an gĭt, jrô tiăr nti ƀư tĭng trong nchrăp ntĭm nti ăp năm tĭng bôk nău rgop an hun hao pâl nđaih bah n’gor dơi N’gor ủy Dak Lak an ƀư bah năm 2021.