Djôt dơn ta ndrĭch dak lêng Quy Nhơn, ăp nar aơ, năch pâl nđaih hăn dŭt âk. Ta nkual ndrĭch ŭm, nô Hồ Văn Thắng, nuĭh kan wơt kơl khách sạn Hải Âu, tâm nău nchrăp lor, ty djôt ao n’ông kơl nuĭh, măt uănh tĭng dak rchoh. Đah nô, nău kan aơ mô an thơ tha, yor rmanh dơi geh dŭt ndal.

Gâp lah nuĭh kan wơt kơl, năch ŭm tâm dak lêng nkual mpeh he ri an njrăng, an uănh năch ŭm m’hâm ƀư lah geh nău an jŭr ntop kơl năch ngăch, wơt săm ngăch.

Mô knŭng ta Quy Nhơn, ta nkual pâl nđaih Kỳ Co, rnoh năch hao âk đŏng, n’ăp tâm rnôk duh hô nung nar. Rmôt wơt kơl dơi pă âk lơn, cano tâm nu nău nchrăp hăn. Năch pâl nđaih dơi nkah mô an hăn dak lêng têh nkual an nking n’gang. Nô Lê Thanh Hùng Anh, nuĭh kan wơt kơl ta aơ an gĭt, rnôk năch lơ âk, jêr jŏt nău kan lơ têh, đă nău rgum âk.

Ŭm dak lêng ta Kỳ Co ntrŭnh ăp nkual geh rse n’gang n’ông ri mbra đăp mpăn, ăp oh kon se ri ŭm êp kơh, lah hăn ngai ri kuăl mbơh hăn lăp êp kơh. Lah nuĭh têh hăn ntŭk dak lôch bôk geh trong dak hoch ri kuăl mbơh năch hăn lăp êp kơh. Nău jăch ndal mbra dŏng mô tô dak n’hanh mboăt kuăl gay mbơh gay ăp nuĭh ndrel ntop kơl.

Nău ntoh kâp njrăng bah rmôt wơt kơl, ndrel trong rse n’ông rwêl khoa học lĕ saơ đăp mpăn an năch. Nô Nguyễn Hoàng Anh, năch pâl nđaih tât bah Hà Nội, uănh lah prêh trong kan đăp mpăn ta aơ.

Gâp saơ lah dŭt di, blău ngăn, âk ntŭk mô geh rmôt wơt kơl kơt aơ, ta aơ geh rmôt wơt kơl n’hanh ao n’ông ta dak lêng jêng gâp saơ dŭt đăp mpăn n’hanh mô rwê lah hăn dak lêng.

Tĭng djôt dơn, ăp ntŭk pâl nđaih kơt Quy Nhơn, Kỳ Co, Eo Gió, Nhơn Lý mô lah Bãi Xép dôl wăch rgum âk nuĭh ƀon lan n’hanh năch pâl nđaih. Yơn lah, geh nău rmok hôm e geh rnôk du đêt nuĭh thơ tha, re dak nkual đăp mpăn mô lah tâm nkual geh trong hoch ngai kơh. Ta năp n’hêl na nê̆ aơ, n’gâng kan ƀon lan lĕ tâm rgop đah rmôt kan n’hao nkoch trêng, nkah ntĭnh n’hanh tâm pă rmôt kâp uănh âk ntŭk.

Wa Phan Tấn Hoàng, Groi Kruanh Rnâng kan UBND phường Quy Nhơn an gĭt, n’gor lĕ uănh nâp rmôt wơt kơl đah tŏng ăp ndoh ndơ, ƀư kâp tĭng mông tâm di, nkre n’hao dơi uănh nđôi.

Bôl geh rmôt wơt kơl n’hanh trong ƀư wơt kơl yơn ntrŭt đă nuĭh ƀon lan rnôk ŭm dak lêng an nsoh ao n’ông rnôk re ngai gay đăp mpăn. Rlău ma nĕ phường dôl tâm ôp ntŭk kan mbơh ntĭm hăn uănh gay ƀư camera rnă njrăng tâm rgop đah njrăng n’gang rmok dak. Rnôk saơ ơm geh rmok đah ăp năch pâl rlưn tât đah Quy Nhơn ri trong mbơh mbra mbơh dâl gay geh trong mkra ngăch.

Ta gưl n’gor, trong kan đăp mpăn an năch dơi ntĭm rđău dŭt n’hâm. Kruanh UBND n’gor Gia Lai lĕ đă ăp nău kan ƀon lan n’hao uănh đôi, groi uănh ăp nău ƀư pâl rlưn tâm dak. Wa Bùi Trung Hiếu, Groi Giám đốc N’gâng kan Văn hóa, Thể thao n’hanh Pâl nđaih n’gor Gia Lai an gĭt, nău ndâk njêng trong wơt ngăch, ndrel đah uănh nđôi, groi uănh rjăp lah trong mkra khlay tâm yan pâl nđaih âk.

Kruanh UBND n’gor Gia Lai lĕ geh ntĭm rđău tât đăp mpăn an năch tât hăn uănh nsong ta ntŭk, N’gâng kan Văn hóa, Thể thao lĕ tâm rgop đah ăp n’gâng kan, ăp ntŭk uănh nđôi ăp ndoh ndơ đăp mpăn an năch rnôk ŭm dak lêng, m’hâm ƀư yan mih năm aơ năch pâl nđaih tât đah nkual dak lêng bah Gia Lai đăp mpăn pâl rlưn.

N’hêl na nê̆ an saơ, bah meng nău nsrôih bah rmôt kan dơi kan, nău wât ăp nuĭh ƀon lan n’hanh năch pâl nđaih lah nkô̆ nău khlay. Nău tĭng ăp nău đă, mô re dak lêng nkual mô đăp mpăn, nchrăp dŏng ao n’ông rnôk ŭch ngăn mbra rgop đêt ngăn ăp nău rmanh yô̆ nđach, gay ăp trong hăn tât đah dak lêng lah ăp nău ƀư ngăn tŏng ăp n’hanh đăp mpăn.