Trong bê tông jê̆ hăn rlet nkuăl têh Đại Lộc, phường Bình Thuận, n’gor Lâm Đồng (bah năp nơh xã Hàm Hiệp, nkuăl Hàm Thuận Bắc, n’gor Bình Thuận). Bar ding đah trong lah ăp mir tăm kao mai dôl ma luh mŭn kao kuăl năm mhe tât. Jêh lôch Tết, rnôk ma ăp kao mai lĕ dang, rŭng êng, kŏ lah rnôk âk rnăk vâl ntĭnh kon, sau hăn pah kan ngai, nâp rnơm năm ba kơi tâm mâp. Rnăk wa Trần Thị Nhẽ geh 8 nŭih kon. Đah wa, rnôk 30 tơm mai bah năp vâl nơm dang luh kao lah nuih n’hâm wa rhơn êng ngăn:

‘Năm mhe saơ kao mai dang ri rhơn ngăn. Mai gâp tăm kơt nê lah kon, sau bah gâp hăn pah kan ngai bơi tât têt mơ dĭng sĭt, rnôk sĭt ri ăp nŭih geh tâm mâp ri ma rhơn ngăn”.

Kao mai dang, Tết tât. Mai rŭng kao, lôch têt. Đah nŭih tăm mai tâm Hàm Hiệp, Phường Bình Thuận, n’gor Lâm Đồng mông nar mô êng geh kơp ma khay, ma hôm kơp ma năm tĭng ăp tơm mai.

Rnăk wa Hồ Đắc Thuận, pe rơh nau rêh rnăk vâl tâm dăch ma nau kan, rnôk aơ mât chăm bơi tât 1000 tơm mai têh, jê̆ tâm mir hvi bơi tât du ha. Nô Hồ Đắc Thuận nkah năm bah ăp tơm, tâm nê geh tơm têh rlau 80 năm, nau nkah bah rơh drâu Che păng rnôk ma ntơm lăp ƀư nau kan tâm nkuăl neh aơ:

‘Ăp năm kơt nê mro, s aơ kao mai lah saơ Tết, ăp nŭih rhơn, n’or ngăn tât năm mhe. Rơh drâu che gâp geh tơm mai tâm neh aơ hôm. Nau năm mai vay ơm bah ƀon hên aơ ri gâp saơ dŭt n’hâm ntô̆ n’hao ngăn mhe ntil kao mai. Mai hên ta aơ ri ntơm 5 tât 18 mbah kao, geh ƀô ngưi kŏ êng đĭng. Ăp năm nŭih tă bah Bình Định, Huế, Đà Nẵng, tă bah miền Tây bu rgum tât ta aơ gay ma rvăt mai âk ngăn”.

Ƀon mai Hàm Hiệp, phường Bình Thuận, n’gor Lâm Đồng geh ma rhiăng rnăk ƀon lan hŏ ƀư nau kan bah âk jêt năm tâm dăch ma tăm mai. Tết năm mhe Bính Ngọ 2026 hŏ hăn rlet rlau ƀon mai Hàm Hiệp, nau rêh lŏ plŏ tay ăp nar đah ƀon lan kan lŏ mir, chăm kao mai, koh n’ging, klih n’ha, bun neh. Ăp mbah kao mai rŭng mô êng lôch du năm mhe tă geh tâm mâp, ma hôm pơk nau rnơm ân nau mra plŏ sĭt tay jêh rnôk năm mhe lŏ tât./.