Lôch bah kơi Tết, ƀon lan nuĭh Mường ta phường Tân Lập, n’gor Dak Lak rgum ta Đình Lạc Sơn ƀư Nău way ntơm lăp kan bôk năm mhe, hôm kuăl lah nău way njŭr tơm njuh. Aơ lah nău way tuch tăm ơm jŏ dơi kônh wa mât ndray n’hanh nđơn ƀư tay ta nkual neh mhe.  

Ntơm bah jâng gung đình Lạc Sơn, nău nteh n’gâm tŭr chĭng goh gong n’gloh lam rnôk ơm ôi, kơt nău rgum đă, kuăl jă kônh wa tât râng nău way dŭt khlay lôch bah kơi Tết. Bŭnh ranh, oh jê̆ kon se tâm ndơ nsoh way ơm uĕh reh ăp tŏng, nchrăp lăp tâm du rân ntơm lăp kan bôk năm mhe.

Tĭng nău way ơm bah nuĭh Mường, tơm njuh dơi rdâk ntơm bah nar 27 khay jât ma bar Bu nong he, ntơm rnôk rlu Tết. Rnôk njŭr tơm njuh lah rnôk dŭt bah ăp nar pâl rlưn năm mhe, kônh wa plơ̆ tay đah mir ba. Nău way ntơm pơk nău kan bôk năm mhe yor kơt nê̆ geh nkô̆ khlay ntơm năl di du jâng ntơm kan mhe, rdâk tay nău nsing nơm an du năm mhe pah kan kan sa jŭr geh.

Bu hăr blău Bùi Văn Thành, nuĭh tơm ƀư nău way ôp mbah Đình Lạc Sơn an gĭt, nău way ntơm lăp kan bôk năm mhe gay mpŏng mpeh nău uĕh lăng n’hanh hơm răm.

“Dăn an me neh ƀon dja dơi đăp mpăn mô geh ntil aơ ndơ to, neh dak rngân uĕh, ƀon lan ngăch lăng. Ƀon lan Mường ƀon bôk năm dăn njŭr lĕ, luh mir jan ba, ta mir yôk ri tăm bum, tăm mbo mhâm an uĕh jêng, mô geh tu ndrŭng chuh sa, ba lŏ ri mô geh sĭch guh ntưp, mbo ri mô geh đe kraih lơh n’hang, bum tăm ri mô geh ndrŭng lôk, geh chai; n’hanh ƀon lan Mường mô geh nău khĭt yot chot chrai, dơn geh nău wơt ƀăn, njŭn klay dơm, ƀon lan dơi manh uĕh” .

Ta phường Tân Lập aƀaơ geh 7 đình làng bah ăp rnoi nuĭh Mường ntrơn du bah Bắc. Ntơm bah mùng 7 tât mùng 10 khay ngoăy Bu nong he, ăp rnăk ƀư njŭr tơm njuh, njêng khuh n’gôr nău kan văn hóa nsum mpôl lam ƀon lan tâm ăp nar bôk năm mhe.

Wa Bùi Thị Hợi, ta tổ dân phố 2B, phường Tân Lập an gĭt, kônh wa nchrăp an nar ƀư brah ơm bah năp nơh, đah nău ŭch rŏng mât ndray nău way ơm an rơh kơn bah kơi tay.

“Rnôk he ƀư kơt nê̆ ri he mbra an kon, an său saơ nău way ơm bah nuĭh Mường he mhâm gay an kon său he gĭt, gay jêh aơ tay păng mbra nđơn tay an kon său mbro mbrăng jêh aơ tay”.

Lôch nău way ƀư ôp brah lah tât gâl pâl rlưn khuh n’gôr. Ntŭp đúm, du ntil ndơ pâl mha êng bah nuĭh Mường wăch rgum âk mpưm ƀon lan râng. Ăp rtuăl đúm ntŭp prêh đah nău ntroh n’gôr mpơl nău mpŏng rêh jêng, hơm răm. Têl rse, hao n’gâng hĭng nghi, mbang sŭr  uk, nhŭp kik… ƀư an đình làng khuh n’gôr tay.

Ăp năm mhe aơ, lễ hội hôm geh nău tât râng bah năch dăch ngai, tâm nê geh năch dak bah dih. Wa Mark Schmidt, năch Canada nkoch nău rhơn rnôk lor bôk năp râng:

“Gâp dŭt rhơn n’hanh n’hao êng săk dơi râng lễ hội dja. Aơ lah du trong ƀư dŭt uĕh gay krêp dêh nsum mpôl, rnăk wâl n’hanh neh dak. Lễ hội dja mpư rnê nău kăl e, aƀaơ n’hanh rƀŏng tât nău rêh let năp tay chrat ang. Gâp mpŏng kâp nău têh hao bah neh dak n’hanh rhơn răm bah nuĭh ƀon lan. aơ lah du ntil nău dŭt uĕh lăng, n’hanh gâp mpŏng he mbra dơi uănh saơ âk lễ hội kơt aơ lơn đŏng”.

Nău way njŭr tơm njuh bah ƀon lan Mường ta Dak Lak mât mbro tâm âk năm aơ, gay mât ndray săk tơm văn hóa bah ƀon lan lam ntŭr neh mhe. Nău way njŭr tơm njuh mpôch dŭt tay ăp nar năm mhe, pơk luh du khay tuch tăm mhe đah nău nsing nơm, nău nsrôih n’hanh nău mpŏng mpeh du năm tuch tăm dơh uĕh, nău rêh hơm răm./.