Ntơm bah rnôk 6h măng, rnôk ma tâm nkuăl ƀon têh hŏ mpoh ang ŭnh ri ntŭk ƀon têh Chợ Jê̆ ntơm âk nŭih. Rlau 60 ki-ốt mpoh ang ŭnh, tăch ăp ntil ndơ sa, dak ngêt, ăp ndơ sa kah bah nkuăl ndrel nklâm ndơ. Nau ueh năm mhe, nau rvăt năp bôk năp khuh n’gôr mô leo tât nau rhơn ân nŭih ƀon lan ma hôm rgop nau ntrŭt dăng nau kan tăch rgâl, ƀư nau kan pâl n’aih tâm bri măng đŏng. Oh Lê Trúc Thảo Nguyên, nkoch:

‘Gâp săch tât nkuăl têh măng Chợ Jê̆ yor aơ lah rơh bôk năp geh pơk ƀư tâm Pleiku, ntŭk ƀư ta aơ hvi ngăn, lŏ geh nau ueh m’ak, ăp ndrơng ndơ tăch ri ueh đah ăp ntil ndoh ndơ ueh ndrel ndơ sa kah đŏng”.

Mô êng ăp băl mom, âk rnăk vâl kŏ săch ta aơ ƀư ntŭk tât bôk năm. Yuh Võ Thị Thu Diễm, tâm Phường Diên Hồng mbơh:

‘Gâp hăn ta nkuăl ƀon têh măng Chợ Jê̆ ri saơ ntŭk aơ âk nŭih, khuh n’gôr. Ndơ sa âk ntil, tâm di ma ăp kon se, ăp băl mom ndrel âk rnăk vâl tât uănh pâl. Tâm nkual ƀon têh tâm bri măng ri geh bu ƀư ueh ngăn”.

Mhe geh leo lăp kan, yơn lah ntŭk tăch ndơ măng Chợ Jê̆ hŏ ngăch jêng nau ueh tâm nau kan hun hao văng sa bri măng bah n’gor. Ngăn lah, tâm ăp nar bôk năm mhe, rnoh năch hao âk, kơl an nau kan tăch rgâl âk lơn, leo tât nau mpŏng ŭch tât du năm mhe pah kan nâp rjăp.

Tâm ntŭk tăch ndơ ngêt sa, yuh Ksor H’Khal tăch ăp ndơ sa bah rnoi Jarai, kơt lah piăng prung, djar gŭch, sur gŭch, ndrôk gŭch, n’ha bum blang chưn ma blên, rtônh. Yuh nkoch:

“Đah ma bu năch âk kơt aơ ri gâp ryơn ngăn yor geh bu năch bu gĭt tât ăp ndơ sa kah bah ƀon lan Gia Lai kŏ kơt lah ăp ndơ sa bah rnoi Jarai. Phung hên ntô̆ n’hao ngăn yor n’gor pơk trong ân hên nkoch mbơh ăp ndơ sa kah bah ƀon lan hên, jŏ jong ri ƀon lan mra gĭt tât nơm âk lơn”.

Măng nkuăl ƀon têh Chợ Jê̆ geh ndâk êp dak jăng Hội Phú, du ntŭk ueh tâm nklang ƀon têh Pleiku, nkre lah ntŭk gŭ tă bah jŏ jong, geh âk nau ơm yau ueh bah nar geh rklaih ƀon.  Wa Đặng Toàn Thăng, Kruanh UBND phường Pleiku, mbơh:

‘Ƀư tăch ndoh ndơ, hăn jâng, pâl n’aih tâm bri măng gay hun hao văng sa pâl n’aih tâm bri măng tĭng ăp nkô̆ nau bah nau ntrŭnh Đại hội Đảng bộ n’gor Gia Lai ndrel nau ntrŭnh Đại hội Đảng bộ Phường Pleiku. Ntơm bah nê njêng luh ăp ntŭk ueh, du ntŭk tât gay bu năch tâm lam dak ndrel n’gor Gia Lai lah nsum mra geh ntŭk ƀư nau kan tâm bri măng đah Phường Pleiku lah êng ndrel nkuăl ƀon têh Pleiku (ơm) lah nsum”.

Măng nkuăl ƀon têh Chợ Jê̆ geh âk nŭih tâm n’gul măng. Aơ mô êng lah ntŭk rvăt ndoh ndơ, pâl n’aih, ma hôm lah ntŭk gay nthoi ƀon lan, nkoch mbơh nau ơm yau tâm ƀon lan ndrel ntrŭt dăng nau kan pâl n’aih bah nkuăl ƀon têh Pleiku. Tâm rnôk yan năm mhe tâm nkuăl yôk prêh, nau khuh răm mpeh nau kan mhe dôl geh ntơm ƀư, mra geh ân du năm geh âk săk ntor./.