VOV4.M’nông: Đoàn n’gor Dak Nông dôl ma ndal nchrăp ân rơh rƀŭn rgum lam ntur neh mpeh trong trôm pư̆ lŭ yôk ŭnh tal 20 (ISV 20) mra geh ƀư tâm dŭt năm aơ, đah nau râng bah ăp dak lah dak kan nsum tâm ăp trong công viên địa chất lam ntur neh UNESCO. Tĭng nau nchrăp, rơh rƀŭn lam ntur neh mpeh trôm pŭ lŭ yôk ŭnh tal 20 (ISV 20) mra geh ntơm lơ 22 tât 26/11/2022. Ăp nau kan geh rơh rƀŭn, tâm nchră, mpla n’hơ ndrel mbơh nkoch nau kan pâl n’aih geh ƀư tâm ntŭk rgum rƀŭn n’gor Dak Nông.

Tĭng wa Tôn Thị Ngọc Hạnh, Groi Kruanh UBND n’gor Dak Nông, nau kan ƀư tơm bah rơh rƀŭn nchră lam ntur neh mpeh trôm pư̆ yôk ŭnh lah rnôk gay ma mbơh, nkoch ân săk tam ngăn mpeh rup ueh bah Công viên địa chất lam ntur neh UNESCO Dak Nông tât băl bên lam ntur neh. Aơ lah rơh gay n’gor ntrŭt dăng nau mĭn njêng khoa học mpeh yôk ŭnh, rgop nau mât ndrel ƀư ân săk tam ngăn ăp nau ueh ơm khlay bah lam ntur neh bah n’gor./.

Nŭih rblang: H’Thi