VOV4.M'nông: Ta Trung tâm Văn hóa n'gor Dak Lak, Cục Nghệ thuật Biểu diễn- Bộ Văn hóa, Thể thao n'hanh Pâl nđaih kan nsum đah UBND n'gor Dak Lak, Hội Nhạc sĩ Việt Nam, Hội Nghệ sĩ Múa Việt Nam mhe ƀư Liên hoan Ca Múa Nhạc lam dak năm 2021 rơh 2.

Liên hoan ca múa nhạc lam dak năm 2021 rơh 2 rgum rlău 1.000 nghệ sĩ, diễn viên tât bah 22 đơn vị nghệ thuật tâm lam dak. Ăp đơn vị đăng ký râng 1 bôk nău njroh mprơ jong ntơm bah 65 - 110 mnĭt, mpeh ntil an uănh saơ lah njroh, mprơ mô lah nkrêh goh nteh dơm, nhạc vũ kịch, thanh xướng kịch. Ntơm bah aơ tât lĕ nar 30/6 tât, ăp mpôl mbra tâm pleh tât tâm rlong gay sơch  ăp đơn vị dŭt uĕh blău n'hanh ntăm an huy chương.

Tĭng NSƯT Trần Ly Ly, Nuĭh dơi manh ƀư Cục trưởng Cục Nghệ thuật Biểu diễn, Kruanh Ban Tổ chức Liên hoan, lôch jong nar geh tât khuch nuh srê Covid-19, ăp đơn vị nghệ thuật râng liên hoan hŏ geh ăp njuat rgâl săk uĕh gay mpơl nău rŏng  n'gâng kan, mpơl nău gĭt blău tâm ban kơt ŭch an lĕ nău gĭt blău.

Liên hoan ca múa nhạc chuyên nghiệp lam dak lôch bah nuh srê Covid ri plơ̆ tay tâm rơh bar dja đah 22 mpôl râng, đah ăp nău mpơl dŭt n'hâm uĕh gay hun hao văn hóa nghệ thuật tâm ban kơt ntrŭt nsôr pâl nđaih Việt Nam. Ăp nuĭh nchrăp dŭt n'hâm ăp jŏ n'hanh ăp nghệ sĩ đah ăp nău rŏng an lĕ nău gĭt blău bah he nơm hŏ ntoh n'gôr. Gâp mĭn lah đah nău mpơl kơt aơ ri liên hoan dja mbra dơi nsĭt geh âk nău dơi tâm ban kơt ăp nău dơi geh dŭt têh đŏng.

Lôch nar ntơm pơk, Đoàn Ca múa dân tộc n'gor Dak Lak ntơm bôk njroh mprơ. Đah nkô̆ “Những bức tranh Bazan đỏ”, mpôl Dak Lak hŏ djôt tât 11 nkô̆ nău njroh mprơ dŭt săk ntơr uĕh, ndjôt săk tơm Tây Nguyên têh hvi. Nău nchrăp ăp tŏng jong, njroh mprơ dŭt way bên bah ăp nghệ sĩ, diễn viên ndrel nău nteh chĭng gong, ndơ uh goh way ơm hŏ nsĭt tay ăp mông âm nhạc âk nău rhơn mƀak, dơn geh âk nău ŭch, ntroh n'gôr bah nuĭh hăn uănh. Ca sĩ Y Hoắt Byă, đoàn Ca múa nhạc dân tộc Dak Lak nkoch:

 Oh nô hŏ nsrôih dŭt n'hâm n'hanh mpơl dơi lĕ suan he nơm tâm nău njroh mprơ nar aơ, saơ he ndrih ma hao njroh mprơ nuĭh hăn djăt uănh tap ti n'gôr ri ƀư an he njroh mprơ lơn ma ntô lô̆ ngăn.

Nuĭh rblang: Điểu Thân