Tâm nê, Lễ hội ndơ ơm cà phê lam ntur neh geh ntơm lơ 18/12 tât lơ 2/1/2026, đah nau ueh lah ntŭk uănh ăp ntil cà phê kah lam ntur neh, ntŭk mpla, ntŭk ngêt cà phê, ndơ sa ndrel ăp bôk nau kan ƀư njroh mprơ kơt măng nhạc cà pê nkuăl ƀon têh yôk, âk ntil nau ntor Nam Mỹ, Noel ndrel rhơn năm mhe 2026. Wa Nguyễn Văn Lộc, Giám đốc N’gâng kan Văn hoá, Thể thao ndrel pâl n’aih Lâm Đồng lah rjăp, cà phê mô êng lah ndơ geh văng sa tơm ma hôm lah nau ntoh ân nau ơm, ndơ kah geh nsum ma nau yau, nau rêh ndrel âk ntil nau ntor bah âk neh dak. Đah rlau 100 năm ndâk njêng ndrel hun hao, Lâm Đồng hŏ ƀư rjăp nau dăng khlay tâm ăp nau kan cà phê Việt Nam, ndrel ma nau kan ê nkra nâp, ê nkra jru, blau nau mhe ndrel pâl n’aih cà phê.

‘Bah ăp ntŭk ƀư nau kan rlong uănh, sa, ngêt, mpa n’hơ, tâm n’ur njroh mprơ ndrel rƀŭn lam ntur neh, lễ hội hôm njêng luh nau tâm nchră pơk hvi, ntŭk cà phê Việt Nam geh ndŏ tâm trong hoch nsum bah ndơ ơm yau kah cà phê lam ntur neh. Tâm rơh tât, n’gor Lâm Đồng mpŏng lễ hội mra njêng nau kan ƀư ăp năm geh nau rnơm, leo tât nau ueh nkah ân Lam Đồng, lah ntŭk tât bah ăp nŭih ŭch cà phê bah lam ntur neh”.

Tâm nau ƀư lễ hội geh Rơh rƀŭn nchră cà phê lam ntur neh, ăp nau kan tâm trong nkuăl ƀon têh ndrel mbơh nau Liên minh Cà phê Việt Nam-lam ntur neh, rgum âk mpưm bu năch ndrel ƀon lan tât, pơk luh nau tât ueh ân rnôk n’hao tâm boh lam ntur neh, ntrŭt dăng nau hun hao nâp nâl bah nau kan cà phê ndrel nau pâl n’aih ueh bah Đà Lạt-Lâm Đồng.

Tâm rnôk bri n’ik bah Đà Lạt, êp nglau Hồ Xuân Hương ntor ueh ndrel khuh tăm bah Lễ hội trong têh, du nau kan ntoh ngăn tâm rnôk ƀư tâm n’ur chĭng gong Đông Nam Á năm 2025. Tâm nklang ntŭk ueh ngăn bah dak nglau, bri tơm n’ho ndrel âk ntil kao dang, nteh chĭng gong ntoch jong, tâm rnglăp ma nau hyơt bah âk rhiăng nŭih tă bah ăp n’gor: Dak Lak, Gia Lai, Quảng Ngãi, Phú Thọ ndrel Lâm Đồng.

Ăp rmôt, ăp rnoi leo tât lễ hội trong têh âk nau kan ơm êng, rgop nau ƀư jêng rup ueh âk ntil, âk nau ơm yau bah chĭng gong Việt Nam ndrel nkuăl Đông Nam Á. Rnglăp nơm tâm nar lễ hội, wa Trần Ngọc Dũng, rnoi Thái, tă bah n’gor Phú Thọ, rhơn nkoch:

‘Đah gâp ri nkuăl rbăn ntil kao Đà Lạt aơ geh âk nau ueh mhe ngăn. Ta aơ ăp ntil kŏ tâm di da dê, bri n’ik, kon nŭih mleh. Mâp âk ngăn rnoi mpôl đêng n’ăp ma ăp rnoi mpôl dak ba dih leo tât ăp nau ơm yau ueh êng êng ngăn. Nau ueh bah kon nŭih lah mô geh ŭch nkhah ngai ơm”.

Mô êng lah nar rgum bah ăp rnoi mpôl Việt Nam, nau ƀư trong hăn hôm lah ntŭk tâm n’ur lam ntur neh. Nghệ nhân Thong Souphoni, tă bah Thủ đô Viêng Chăn, dak Lào mbơh, râng nau ƀư Lễ hội Chĭng gong Đông nam Á năm 2025 yor n’gor Lâm Đồng ƀư, rmôt kan tă bah dak rkeh Bôk rveh leo tât ăp nau nteh chĭng, ndah ao geh âk ntil êng ndrel Đà Lạt-Lâm Đồng kŏ geh lơi âk nau ueh ma nuih n’hâm păng:

‘Ăp nŭih hăn râng tâm n’ur bah Lào nar aơ nsoh nah ao Lào, bok put Lào ueh ngăn. Tâm Lâm Đồng âk ntŭk ƀư pâl n’aih ueh, bri ri n’ik. Âk ntil kao ueh. Kon nŭih ta aơ rêh ueh m’ak ndrel geh âk ndơ sa kah”.

Tâm nau khuch n’gor bah Lễ hội chĭng gong Đông Nam Á năm 2025, lễ hội trong hăn geh tâm êp nglau Hồ Xuân Hương-Đà Lạt mô êng lah rnôk gay ƀư nkoch n’hơ ma hôm lah nau nthoi đah ăp rnoi mpôl oh nô, ăp neh dak tâm nkuăl bah ăp ntŭk ƀư nau tur chĭng, goh gong, ndơ khlay ah rnoi nŭih. Ăp nau nteh chĭng tâm nklang Đà Lạt dôl rêng nau ŭch mpeh nau tâm rnglăp, tâm ryơk ndrel mât nau khlay ueh ơm tâm nau rêh mhe./.