Nkhêp geh Tết way ơm bah 2 dak băl Lào n'hanh Campuchia, ta nkual ƀon têh Kon Tum mhe ƀư Nar rgum tâm nđŭr văn hoá Việt Nam- Lào- Campuchia. Nar rgum geh âk nău kan geh nkô̆ khlay kơt: tâm nđŭr njroh mprơ rnê nău tâm rnglăp, tâm boh tâm brê, krêp dêh du nuih n'hâm bah 3 dak; nchreng ndơ nsoh way ơm 12 rnoi nuĭh oh nô dôl gŭ rêh, kơt nti n'hanh pah kan ta nkual n'har bri; rdâk tay du đêt nău way ntoh lư tâm nar Tết way ơm Bunpimay n'hanh Chol Chnam Thmay.

Ndrel đah nkoch n'hơ rŭp uĕh Tết way ơm bah 3 dak Việt Nam- Lào- Campuchia, ta Nar rgum tâm nđŭr njroh mprơ văn hoá Việt Nam- Lào- Campuchia đah nkô̆ "Săk ntơr văn hoá Đông Dương”, ăp băl sinh viên n'hanh năch  râng hôm dơi rlong sa ăp ntil ndơ way ơm, ndrel tâm ôp gay gĭt wât tay mpeh văn hoá bah ăp dak ntơm bah nê bun dăp nău tâm rnglăp, tâm boh êt lhăt đah 3 dak.