Mbah rhơn nkah ndray 110 năm njêng n'gor Kon Tum, nar 7/2, ta dak me Đăk Bla ƀư tâm rlong duk si lôk way ơm nkual ƀon têh Kon Tum pơk hvi năm 2023.

Râng tâm rlong duk si lôk way ơm nkual ƀon têh Kon Tum pơk hvi năm aơ geh 11 rmôt tâm rlong đah 60 nuĭh tâm rlong. Ăp rmôt tâm rlong duk tât bah 9 xã, phường bah nkual ƀon têh Kon Tum n'hanh 2 nkuâl: Sa Thầy, Ia H’Drai. Ăp rmôt tâm rlong duk tâm rlong ta rnoh jong 200m n'hanh 1.500m.

Tâm rlong duk lah rnôk gay ăp nuĭh tâm mâp, tâm nđŭr, mât ndray n'hanh hun hao ăp môn thể thao rnoi mpôl đê̆, ƀư njêng nuih n'hâm nsan hao bôk năm mhe n'hanh mbah rhơn nkah ndray 110 năm njêng n'gor Kon Tum. Lôch ăp tơ̆ rvăch tâm rlong khuh n'gôr, kêng dŭt rmôt tâm rlong xã Kroong, nkual ƀon têh Kon Tum geh giải Nhất ta rnoh jong 200m; rmôt tâm rlong xã Sa Bình, nkuâl Sa Thầy geh giải Nhất rnoh jong 1.500m. Ban tổ chức nkhôm an Rmôt geh dŭt âk bôk duk tâm rlong an xã Sa Bình n'hanh rmôt tâm rlong duk xã Kroong geh giải Nhất lam rmôt.