Bâh ntơm ơm ôi, ta tach jâng gung ngih cộng đồng ƀon Ky geh dŭt âk ƀon lan tât râng. Mom ndăm rĭ kơl ăp bu ranh dăp jut tay chĭng. Ăp bu ur druh ueh n’her nkrơ̆ tâm ndơ nsoh mbân ao mhe way ơm ndrel nchrăp ƀư kuăl brah...Bu druh H’By La Byă rhơn ngơi.

“Aơ lah rơh bôk năp oh tât râng ƀư kuăl brah mih jêng mô hŏ geh gĭt vât âk, yơn ma oh saơ dŭt rhơn Ta nâm n’hâm tơm si têh, nuĭh ƀon lan lĕ nchrăp bar ndưp nkơng gay ma ƀư ntŭk kuăl brah mih. Du ndưp lah ntŭk kuăl brah trôk, ndrel đah ăp ndơ kuăl brah ntĭt n’hao an trôk. du ndưp lah ntŭk đăm mbo, ba. Mpeh ba dâng lah an ăp brah djơh, geh rmal yor lĕ an sĭm, đe, dôk kraih ƀư khuch mir, sa lĕ mbo ba. dăch nĕ lah ăp ntil ndơ kuăl brah kơt ndrănh yăng, djăr, ndơ ma ngâr ndrel đah ăp rup ndah mon ma si rup ăp ntil rveh, mbik, yău.

Rnôk chĭng ntơm tŭr, bu n’hŭm ntơm răk nău kuăl brah bâh ntơm kăl e, đah nău ŭch dăn an mih lăng prăng sơh, mbo ba mbôn lăy, tâm ban kơt ntru lĕ kriah đe, nău mô ueh tât đah ƀon lan. Lôch ƀư kuăl brah, nuĭh răch brah joat jâng ntĭt an dâng lo, lôch nĕ ƀư tuch tăm. Bu rănh kuăl brah hăn bôk năp, bar ti ntâp rmul ta neh, lôch nĕ lah ăp bu ur Rđe tĭng ba kơi tuch ta trôm rmul. Rnôk ăp dak mih tŭp ta neh, ăp nuĭh ndrel doh drat, rhơn ta yan tuch tăm mhe.

Râng rơh kuăl brah mih, wa H’Luêch Hđơk, 65 năm deh ngơi.

“Gâp dut rhơn ngăn, yor lah gâp saơ geh ƀư tay nău kuăl brah bâh kăl e bâh rnoi rđe lah ăp năm geh ƀư du tơ̆ ê lor tuch ba, rĭ kăl e nơh kơt nĕ. Kahgĭt tay rnôk gâp jê̆ nơh geh râng kuăl brah mih, aƀaơ saơ bu ƀư tay kơt nĕ gâp rhơn ngăn”.

Tĭng nău mbơh bâh bu ranh ƀon Y Bang Byă, ta ƀon Ky, phường Thành Nhất, nkuăl ƀon têh Buôn Ma Thuột, ntơm nơh, nău kuăl brah mih way geh nuĭh Rđe ƀư tâm rnôk khay wai, lôch su ntuĭh, kâp dak mih tŭp lah tuch dâl. Rnôk nău rêh lĕ rgâl, ƀon lan geh nău rgâl, mir ba kăl e lĕ jêng tăm tiu, cà phê, âk nuĭh nklơi ƀon hăn rêh pah kan ta nkuăl ƀon tê...nău ƀư kuăl mih lĕ ntơm roh rui. Yơn ăp năm dăch aơ, đah nău kơl bâh ngih dak, ƀon lan lĕ geh ndâk nsơm tay ăp nău kuăl brah way ơm, nkah ndrăy tay nău ueh văn hóa, mpŏng tât nău rêh ueh lơn:.

 “Di lah gay ma mât tay nău way bâh rnoi nơm lah du nău dŭt jêr ngăn đah ƀon Ky, yơn geh nău kơl an bâh phường Thành Nhất, lĕ kơl an du đê̆ rnoh prăk gay ma thôn ƀon ƀư kuăl brah mih. Kuăl brah mih geh nău khlăy ngăn an yan mih năm aơ geh dơh ueh mpeh mbo ba, nău rêh ƀon lan ăp nar lơ ma ueh lơn n’hanh nsĭt tay piăng sa, ao n’gut ueh an ƀon lan tâm ban kơt lĕ ta Tây Nguyên”.