Sở Văn hoá, Thể thao ndrel pâl n’aih Lâm Đồng dôl ma ndak ƀư nau ndâk nau nchrăp ƀư ăp nau kan du pơh ƀư nau kan pâl n’aih Lâm Đồng năm 2023. Đah nkô̆ “Lâm Đồng-nkuăl neh bri ueh nâp”. Du pơh ƀư nau kan pâl n’aih Lâm Đồng nchrăp geh ntơm lơ 27/4 tât 3/5 tât tâm ăp nkuăl, nkuăl ƀon têh tâm n’gor. Tâm nê, rgum ngăn tâm nkuăl ƀon têh Đà Lạt, đah âk nau kan kơt: Lễ hội âm nhạc lam ntur neh, ntŭk ƀư mpla nkoch tât ăp nau ueh ơm bah ăp rnoi tâm n’gor; ntŭk ƀư nau nkoch mbơh ndơ sa “Ndơ sa kah Đà Lạt”, mpla n’hơ rup ueh “Ƀon tơm-kon nŭih Tây Nguyên-Duyên hải miền Trung”.

Bôk nau kan njroh mprơ ndrel ƀư nau nsoh ăp ntil nah ao ueh ơm- “Nau ueh bah ndơ ơm yau Nam Tây Nguyên”. Tĭng wa Nguyễn Thị Bích Ngọc, Groi giám đốc Sở Văn hoá-Thể thao ndrel pâl n’aih Lâm Đồng, du pơh ƀư nau kan pâl n’aih năm aơ lah nau tâm rgop nsum ăp ntil bah âk nau kan văn hoá, thể thao, njêng luh ăp ntil ndơ pâl n’aih ueh mhe gay ma kơl an nau ŭch hăn pâl n’aih, hăn mêt uănh bah ăp bu năch tâm ndrel bah dih dak./.