- Ơi wa, lah nuĭh gĭt blău dŭt ŭch văn hóa rnoi nuĭh Jarai, wa lĕ dơi djăt n’hanh gĭt âk mpeh ot ndrong bah nuĭh Jarai đŏng?

Wa Rmah Ban: Ngăn ma lah, lah djăt bu ot ndrong ri gâp mô hŏ djăt lôch, gâp knŭng djăt nuĭh aơ nkoch du gâl, nuĭh ri nkoch du gâl. Ntĭt nsa kơt ot ndrong Yă Pôm, ndrong Drit, Ndrong Kơmung Kuăng, Ndrong Ơi Tŏn, Ndrong Bu kông yă, Ndrong Ƀlor, Ndrong But tơkông yă, Ndrŏng Jong Be, Ndrong Set Rok... djăt bu nkoch tay dơm, dơi djăt 1, 2 gâl dơm, mô hŏ geh djăt lĕ rngôch...

- Tă bah ăp ot ndrong Jarai ma wa dơi nkoch, nkô̆ nău ot ndrong bah nuĭh Jarai way ntĭnh ntăn nuĭh bah kơi mêh?

Wa Rmah Ban: Nuĭh Jarai kơt rnoi nuĭh êng dơm, tă bah ăp nău nkoch ot ndrong bu ŭch ntĭm an he ăp nău blău mpeh trong ƀư nuĭh, trong tâm uănh tâm ngơi, ăp nuĭh m’hĭk mbra geh rmal, đah nuĭh n’hanh nuĭh an gĭt tâm mât tâm rgum ndrel. Aƀaơ tâm ƀon gâp ri mô hôm geh nuĭh nkoch ot ndrong tay, nuĭh hôm e rêh ri săk soan mô hôm ngăch, khân pơng mô tŏng soan gay nkre nkoch nkre mprơ. Hôm nuĭh gĭt nkoch đê̆ đă ro hôm e 1-2 hê dơm. Nar aơ bu uănh ti vi, radio, ăp ntil trong mbơh ntĭm uĕh jêng đêt nuĭh djăt nkoch ot ndrong, ma nuĭh gĭt nkoch ot ndrong ri mô hôm âk.

- Tĭng wa, nău kan dơi kan an ƀư gay mât ndrăy văn hóa way ơm rnoi nuĭh Jarai lah nsum, n’hanh ot ndrong lah êng?

Wa Rmah Ban: Radio Nău ngơi Việt Nam uănh tât, rgum mât ăp nău nkoch ot ndrong, gay rơh bah kơi djăt n’hanh mât rƀăy. Geh nuĭh tât dăn gay djăt nuĭh ranh nkoch ot ndrong yơn ma khân pơng mô nkoch, khân pơng lah khân pơng mô gĭt, yor nơm mô gĭt trong bônh. Mô di ndơ̆  an khân pơng prăk mbra nkoch an he djăt, nău khlay ngăn lah nuih n’hâm bah nuĭh rgum joi, lah gĭt bônh ri mbra rgum joi geh. Nău rgum joi ot ndrong dŭt ndăn, an lăp tâm ƀon lan gay mĭn joi, rgum mât, prăp ndrăy, lah he an mbrơi, chuêl pơng, ri let năp jŏ jong he mbra mô hôm dơi djăt ot ndrong tay.

- Wa geh nău dăn đă đah ngih pah kan dơi lan gay mât ndrăy văn hóa ot ndrŏng Jarai tâm năm tât đŏng?  

Wa Rmah Ban: Mpŏng ŭch bah gâp ri âk ngăn, yơn mô gĭt geh dơi ƀư lĕ đŏng. Gâp mĭn he hăn rgum joi nău ot ndrong, nkoch ot ndrong he nchih tay, nchih tay, in jêng ăp ndrôm sam ƀŭt, he dơi nchih bah nău nkoch tĭng nốt nhạc, gay nkre gĭt nău ot ndrong nkre gĭt er, ăp nuĭh dơi tĭng nti, mprơ ot ndrong tĭng er.

- Dăn lah uĕh wa đah nău tâm nchră aơ.