Pơh bah năp nơh, UBND n’gor Gia Lai ƀư tâm nchră uănh năl tay nău tĭng ƀư trong nchrăp hun hao pâl nđaih lvang năm 2021-2025; nău ŭch ndơ̆ pâl nđaih jêng n’gâng kan chông tơm khlay bah n’gor.

N’gor Gia Lai săk geh âk gay hun hao âk ntil nău kan pâl nđaih bri dak, văn hoá, nsum mpôl,... N’gor săk geh âk văn hoá, ntŭk tŭr chĭng goh gong, Nkual rnă ntêm n’hâm sial dor yôk Kon Hà Nừng, ndrel đah tuch tăm âk ntil tơm n’hanh leng dak, trôk nar nđik uĕh, âk ndru ntŭk têl ơm yău kăl n’hanh ntŭk têl ơm yău sơ kỳ lŭ ơm…

Tĭng trong nchrăp hun hao pâl nđaih lvang năm 2021-2025 bah UBND n’gor Gia Lai, n’gor nsrôih tât 2025, pâl nđaih jêng n’gâng kan wăng sa n’gâng tơm, đah âk ntil ndơ pâl, săk uĕh. Rnôk dja, n’gor tâm pă rlău 500 rmen prăk tơm prăk ntuh kơl ngih dak gay an ƀư 9 ntŭk ntô ndơ dŏng nta trong gay hun hao pâl nđaih. Ăp năm, n’gor ƀư âk nar kan văn hoá, thể thao; n’hao dăng nkoch n’hơ ăp săk geh  dơh uĕh mpeh pâl nđaih.

Yơn lah, aƀaơ, mhe geh 3/9 trong nchrăp kan mpeh ntŭk ntô ndơ dŏng mô hŏ ƀư lôch jêh. Gia Lai mô hŏ wăch rgum dơi doanh nghiệp dak bah dih, doanh nghiệp tâm rgop kan nsum mpeh pâl nđaih; săk uĕh ndơ pâl nđaih mô hŏ lăng âk, mô hŏ lôch jêh âk. Wa  Nguyễn Tấn Thành- Kruanh Hiệp hội pâl nđaih Gia Lai geh nău rgop:

“He ân mĭn ŭanh di tay: ngih dak hŏ nta trong dơh an ntŭk ntuh kơl soih aih, lăp uĕh mô hŏ tŏng suan dăng wăch rgum ntuh kơl đŏng? Tơm ndơ âk mpưm n’hanh lăp uĕh, yơn gay ƀư jêng ndơ pâl nđaih ri ân geh nău ntuh kơl ăp tŏng rêng, geh nău sơch. Ntŭk I dơh, geh ndơ ma hun hao lơn ri ntuh kơl lor, tĭng di rêng, ri năch mơ gĭt tât, nuĭh ƀon lan mơ geh tơm wăng sa".

Ta tâm nchră, wa Nguyễn Thị Thanh Lịch- Groi kruanh UBND n’gor Gia Lai dăn đă ăp nkuâl, ăp n’gâng kan ôp uănh tay ăp tŏng lam lĕ rngôch, ntrôl dăng tay an ƀư ăp trong nchrăp kan ntuh kơl  ntŭk ntô ndơ dŏng lah prăk gay hun hao pâl nđaih; ôp uănh tay ăp ntil ndơ  geh ƀư pâl nđaih gay hun hao rgum tơm; tĭng ƀư tâm rgop rkŭm pâl nđaih; ăp nkuâl  n’hanh ăp n’gâng kan văn hoá gay an ƀư tay ăp nău  kan văn hoá, lễ hội, n’hao dăng nkoch n’hơ n’hanh nta trong dơh gay ndơ̆ ndơ geh ƀư tuch tăm bah nuĭh ƀon lan tât đah năch pâl nđaih. Wa Nguyễn Thị Thanh Lịch êng njrăng ŭanh khlay mpeh nău hun hao pâl nđaih nsum mpôl lam  ƀon lan rƀŏng tât jŏ jong:

“Jao Sở Văn hoá Thể thao n’hanh pâl nđaih ntĭm nti nău way kan mpeh pâl nđaih nsum mpôl lam ƀon lan. Rnôk ƀư dơi pâl nđaih nsum mpôl lam ƀon lan, nkre đah pâl nđaih tuch tăm, ri nău dja lah jŏ jong. Geh nău tât râng bah lam ƀon lan, bah aơ mbra mât ndray dơi văn hoá. Yor nsĭt tay joi geh nău rêh an kônh wa ri kônh wa n’hao êng săk n’hanh mât njrăng nâp dăng.”