Đah nkô̆ nau ‘Nthoi ăp nau ơm” rơh mpla n’hơ mbơh tât bu năch 100 păng rup bah ăp nŭih nklih rup tă bah bar dak Việt Nam ndrel Hàn Quốc. Tâm nê, nau ơm yau ndrel kon nŭih neh dak Kim Chi; 40 păng rup bah ăp nŭih nklih rup Việt Nam rgum nkah ăp nau ueh, nau rêh ơm yau ndrel nau ntrơn rgâl bah nkuăl neh Dak Lak lah êng, Tây Nguyên lah nsum.

Tĭng wa Hồ Sỹ Minh, Groi Kruanh Rnâng kan Rmôt nklih rup Việt Nam, nau mpla n’hơ lah nau kan khlay tâm trong kan tâm n’ur nau ơm đah ăp nŭih nklih rup bah bar dak, rgop nau ƀư jru nâp lơn tay nau tâm boh kan nsum ăp ntil Việt Nam-Hàn Quốc. Nau mpla n’hơ năm aơ nkah ntrong 5 năm tâm n’ur đah ăp nŭih tâm rmôt Nghệ sĩ nklih rup Việt Nam-Rmôt kan Nklih rup bah Hàn Quốc ndrel mpla n’hơ tal 2 geh ƀư ta Việt Nam:

            ‘Ăp rup ueh mpeh Hàn Quốc ntoh dơi ăp nau ơm ueh bah khân păng, kŏ geh ăp nau rƀŭn rgum, kŏ geh ăp rnoi mpôl êng êng, ndrel ăp rup nkoch mpeh dak nơm kơt nê đŏng. Ndri ma gâp mĭn rơh mpla n’hơ rnôk aơ lah du nau tâm n’ur jri ngăn mpeh nau ơm yau, mpeh pâl n’aih ndrel ngăn lah nau gĭt blau bah kon nŭih tâm nkuăl neh aơ. Nau mpla n’hơ rgop nau ƀư ân bar dak, bar rnoi mpôl tâm êp tâm dăch lơn ndrel tâm gĭt rbăng ndrăng nơm âk lơn”.

            Ntŭk mpla n’hơ geh ƀư tâm ntŭk Bảo tàng Dak Lak, êp Ngih jong bah rnoi Rđe, njêng nau mhe mpeh nau ơm yau ueh ngăn ân nau kan tâm n’ur tâm rnôk aơ.

            Jêh nar ntơm ƀư, ăp nŭih nklih rup bah Việt Nam ndrel Hàn Quốc mra râng âk nau kan ƀư nklih rup ngăn, joi uănh tât nau rêh, nau kan ndrel ăp ơm yau ueh bah ăp rnoi mpôl tâm n’gor Dak Lak.

            Bah năp nê, ntơm lơ 7/5, rmôt nklih rup bah 2 dak hŏ geh nau kan hăn ƀư kan n’hêl, tâm rgop ma nau hăn pâl n’aih ntoh lư tâm du đê̆ n’gor tâm du đê̆ n’gor nkuăl duyên hải Nam Trung Bộ.  wa Soun Byeong Hyo, Kruanh rmôt kan nklih rup bah Hàn Quốc, ntoh nau ŭch ngăn đah ăp nkuăl neh ndrel kon nŭih tâm Việt Nam lah nsum ndrel Dak Lak lah êng:

            ‘Ndrel ma nau hăn nsum ma ăp nŭih nklih rup bah Việt Nam tâm ăp nar hăn ndrĭng ƀư ri ăp rmôt kan hŏ hăn nklih rup tâm âk ntŭk, geh âk rup ueh ndrel ma rnôk leo nsĭt tâm Hàn Quốc ri ngăn lah mra mbơh tât ăp nŭih ƀon lan Hàn Quốc mpeh ăp rup ueh, ăp ntŭk ueh bah Việt Nam, ngăn lah bah Dak Lak ndrel Buôn Ma Thuột. Gâp hŏ hăn Việt Nam âk hôm, tâm nê geh Mù Cang Chải lah ntŭk geh âk rup ueh ngăn ndrel jêh nê lah tâm ntŭk aơ, tâm Buôn Ma Thuột kŏ geh âk rup ueh. Gâp mra njoăl pă ăp rup ueh tă geh nê ân ta aơ tay, jêh rnôk ma săch uănh tay ăp rup tâm rnôk hăn rơh aơ”.