Ngoăy tâm ăp nău kan uĕh mƀak, wăch rgum âk mpưm năch n’hanh nuĭh ƀon lan ta ntŭk uănh khlay tâm pơh ntơm pơk Năm Pâl nđaih gưl neh dak 2026 ta Gia Lai lah “Nar rgum ngêt sa”. Geh nklăp 50 ndrơng ndơ, tâm nê 28 ndrơng ndơ tăch ndơ ngêt sa, đah nău tât râng bah âk nuĭh way blău n’gor trău. Nar rgum hôm rgop mpư rnê rnoh khlay ndơ ngêt sa way ơm ăp rnoi nuĭh Tây Nguyên.

Rlău 15 năm dâk n’gon trău ta âk jay tăch ngêt sa ntoh lư ta Quy Nhơn, nô Huỳnh Tấn Dũng, ntŭk tăch ndơ sa rnăk wâl “Rừng nướng” ta phường Quy Nhơn way nđơr đah nău gân djăng ƀư ndơ sa Tây Nguyên. Nô Dũng an gĭt: Năch tât đah Quy Nhơn, Gia Lai dŭt ŭch âk ăp ndơ sa bah nkual yôk prêh, ndrôk, be gâm hôl ma dĭng ngâr mô lah djăr nđôch, sŭr mpor jŏk gŭch ma ŭnh rnga.

“Săk gâp nơm ŭch rŏng hun hao ndơ kah khlay ƀon tơm he nơm đah ăp ntil ndơ hŏ geh đŏng. Gâp ƀư ndơ sa ŭch nđơn trêng nău lư tât yuh nô, kônh wa lah ŭch ƀư âk ndơ sa bah he đŏng, ŭch kan tâm pot rlŭ đah ăp ndơ tê̆ ƀô kah ơm geh ta ntŭk he tâm ban kơt ta Việt Nam he gay ăp năch pâl nđaih rnôk hăn tât Việt Nam tâm ban kơt hăn tât Gia Lai, tât nkual ƀon têh dak lêng he mbra dơi rlong sa ăp ndơ kah Việt Nam he way uĕh ngăn, mô ndơm rlăm”.

Bọ dak lêng gâm hôl n’hanh tiết canh Bọ dak lêng, ka Chình gŭch ŭnh rnga, lẩu Tui bŭng, Hàu đại dương gŭch phô mai, ka dìa dak lêng gâm mẳn… lah ăp ndơ sa ƀô kah dak lêng, dơi nuĭh tơm gâm ƀư ta ăp ntŭk tăch ndơ ngêt sa Quy Nhơn n’glăp tâm săk rhŏ dŏng năch tâm rêng nar bah Năm pâl nđaih gưl neh dak- Gia Lai 2026. Tât đah Quy Nhơn pâl nđaih n’hanh rlong saơ tâm năm pâl nđaih  gưl neh dak 2026, nô Trần Nhật Đông, năch pâl nđaih ta nkual ƀon têh Hồ Chí Minh nklân năl:

“Ndơ ngêt sa Quy Nhơn dŭt âk mpưm, rlău ma ndơ tui ka dak lêng hôm rêh ri săk nơm dơi rlong sa du đêt ndơ sa bah yôk bri Tây Nguyên đŏng kơt ăp ndơ sa gŭch. Ƀô kah ri tâm di đah mpeh Bắc tâm ban kơt mpeh Nam đŏng. He saơ dah rŏng tâm ban kơt ndơ sa ta jay”

Wa Nguyễn Thị Kim Chung, Groi giám đốc Sở Văn hóa Thể thao n’hanh Pâl nđaih n’gor Gia Lai mbơh lư, tâm rnôk Gia Lai jêng du ntŭk tât khlay tâm rêng ƀư Năm pâl nđaih gưl neh dak 2026, n’gâng kan rhŏ dŏng ndơ ngêt sa ta ntŭk dôl geh ăp njuat hăn rgâl kloh. Ăp ntŭk tăch ndơ ngêt sa n’hao nău gĭt êng dơn kan tâm tăch rgâl, rƀŏng tât rdâk njêng rup gui pâl nđaih dêh bên, rsang rnglay:

“Tâm pơh lễ năm pâl nđaih gưl neh dak, ăp đơn vị tăch rgâl pâl nđaih ta n’gor hŏ lor nchrăp n’hao săk blău rhŏ dŏng tâm ban kơt ntŭk ntô ndơ dŏng kĩ thuật, rmôt tơm nuĭh kan gay rhŏ dŏng năch pâl nđaih. Ăp đơn vị hŏ uănh khlay ƀư jêng âk ntil ndơ geh ƀư lah ndơ ngêt sa đŏng, ăp ndơ sa ntĭt êng bah n’gor. N’hao dăng pah kan nkoch trêng nkơnh n’hơ an năm pâl nđaih gưl neh dak gay mbơh lư tât năch pâl nđaih mpeh ăp bôk nău kan tâm năm pâl nđaih gưl neh dak”./.