Mông nti dŭt pơh, nglang ngih săm ƀŭt Tiểu học Tô Hiệu, Phường Ea Kao, n’gor Dak Lak khuh răm ăp nau ƀư kan tĭng nau ơm yau ueh. Ăp kon se tât râng nau vẽ, koh, lir, ndop nau kan. Ăp n’ha rđaih nglang mpơl kloh lơn ăp ntil kao chah tâm bok njuh tanh, nau ueh tâm ƀo, nau kan ăp nar. Nau nkra ƀư ngih jong, chĭng gong geh dơi ndâk nkra tay, nsum ma nau nkoch mbơh bah năp âk nŭih tâm ngih săm ƀŭt. Oh H’Trâm Niê, kon se nti jrâu 5E mbơh:

            ‘Gâp ŭch ngăn lah nau kan ƀư STEM bah ăp jrâu hŏ geh mpla n’hơ ăp ndơ nơm ƀư gay ntoh ân nau ueh ơm bah rnoi mpôl Rđe. Gâp rhơn ngăn mpeh nau ơm yau ueh bah rnoi nơm, gâp ŭch jêh aơ ngih săm ƀŭt mra ƀư âk tay nau kan kơt aơ lơn gay gâp mra dơi ƀư ueh tĭng nau ơm bah rnoi nơm”.

            Khuh răm ngăn lah nau tâm rlong Rung Chuông Vàng đah ăp nau ôp geh tât nau gĭt rbăng bah ăp rnoi mpôl tâm ntŭk, kơt Rđe, Bunong. Oh Đinh Diệp Anh, kon se nti jrâu 3A mbơh: ăp nau âp ân saơ nau nchrăp joi gĭt lor bah kon se nti, đah ăp nau gĭt tât ngih jong, nau rgum rƀŭn, chĭng gong...

            ‘Gâp saơ rhơn ngăn ndrel dŭt n’ơr. Gâp geh gĭt tay âk nau mpeh nau vay ơm bah rnoi Rđe kơt ngih jong, chĭng gong, nah ao ndrel ăp nau vay rgum rƀŭn ngêt sa geh tât nau ơm khlay bah rnoi Rđe”.

            Nau rhơn bah kon se kŏ rêng lơn tât ăp me mbŏ.  Wa Lê Đình Nam, geh kon dôl nti tâm ngih săm tâm ngih săm ƀŭt Tiểu học Tô Hiệu ân lah, đah ăp nau ntĭm nti ndrel tĭng uănh ƀư kơt aơ rĭ ăp kon se hŏ geh âk nau rgâl âk ngăn:

            ‘Ăp kon ri rhơn n’ơn ndrel nchrăp ân nar rgum STEM, ăp nar kŏ nkoch nar aơ gâp geh vẽ rup, nar aơ gâp geh nti kdŏ đah ăp nai, gâp ŭch ngăn, gâp mô dơi hăk bĭch ôh ri ma me mbŏ kŏ saơ rhơn nsum ma ăp kon nơm đŏng’.

            Tĭng wa Đoàn Thị Tuyết Yên, Hiệu trưởng Ngih săm ƀŭt Tô Hiệu, ngih săm ƀŭt geh bơi tât 1.200 kon se nti, tâm nê âk kon se rnoi mpôl đê̆, ăp nau kan aơ pơk luh nau ueh gay kon se geh tâm n’ur, kơt nti, rgum tay nau gĭt mhe, mât dray ndrel rêng ăp nau ơm yau ueh:

            “Aơ mô êng lah nau kan bah dih mông nti dơm dam ôh, ma păng hôm lah du ntŭk ueh ngăn geh ăp kon se kơt tĭng nti, geh dơi nau ƀư blau mhe ndrel dŏng ăp nau ơm yau ueh mpeh STEM hŏ geh ntim nti gay ndâk ƀư tay ăp ndoh ndơ dŏng, nau kan văn hoá bah rnoi Rđe, gay mât ndrel ƀư rêng tay ăp nau ơm yau ueh bah n’gor nơm’.

Tâm Dak Lak, âk ngih săm ƀŭt phổ thông hŏ ƀư ăp nau kan ơm yau ueh đah âk nau kan êng êng. Rnôk geh ƀư njêng nkra êng, joi gĭt ndrel nkoch mbơh, ăp kon se mra geh rgum âk nau gĭt blau ndrel njêng nau rhơn n’ơn, nau mât njêng nsum ma ăp nau ơm yau khlay bah ƀon lan. Ăp grăp ntil ntil nê lah nau ueh gay nau ơm yau lŏ geh mât nâp, ƀư rêng tay tâm ƀon lan”./.