Đah ƀon lan Tây Nguyên, bol ma ê hŏ du tơ̆ geh mâp wa Hồ yơn tâm nuih n’hâm ăp nuĭh rĭ rup wa Hồ n’hanh ăp nău nkoch đah wa hôm nha geh nkah ndrăy. Ta nkual pah kan cách mạng Krông Bông, ăp nău nkoch, nău pah kan bâh wa Hồ way geh nuĭh ƀon lan ƀư tĭng tâm nău rêh ăp nar. Nô Y Phang Byă, ta ƀon Krông, xã Ea Tul, nkuăl Krông Bông an gĭt: " Gâp deh tâm rnôk ngih dak lĕ đăp mpăn hôm, gâp mô hŏ tă geh mâp wa Hồ, yơn tâm nău rêh rĭ săk gâp nơm dŭt rŏng đah Wa yor lah wa lah du hê nuĭh leo kan dŭt blău n’hanh dŭt ntoh lư. Yor geh ŭch kơt nti n’hanh ƀư tĭng nău Wa jêng tâm nău pah kan ăp nar tâm ban kơt tâm nău pah kan đah ƀon lan, gâp lĕ dŭt nsrôih kơt nti Wa bâh ăp nău kan dŭt jê̆ ngăn, nsrôih an hun hao wăng sa rnăk vâl, ntop rdâk njêng nău kan ta ntŭk, kơl an ƀon lan ăp nuĭh jêr jŏt tâm ƀon".

Ndrel đah nuĭh ƀon lan ăp nkual lam dak wơt Tết đăp mpăn, tâm ăp nar aơ, kônh wa nuĭh Bahnar ta ăp ƀon lan dăch ngai ta n’gor Gia Lai mpoh nhanh nkah gĭt Wa Hồ, nuĭh lĕ nsĭt tay đăp mpăn an rnoi mpôl đêt. Bu ranh ƀon Yơu ƀon Ktu, xă Kon Gang, nkuăl Đăk Đoa nkoch: “Nkoch mpeh Wa, bah kon se tât nuĭh têh mô geh nuĭh mô gĭt. Wa Hồ lah du nău mĭn têh tâm du kon nuĭh rêh uĕh, du hê kruanh têh bah neh dak he. Bôl mô hŏ du tơ̆ mâp, tâm nuih ăp nuĭh he saơ geh Wa bah meng, geh Wa uănh nđôi tĭng trong, tĭng nău ƀư. N’hanh bah nĕ ăp nuĭh nsrôih nti nsơm, ƀư tĭng nău uĕh bah Wa, nkah gĭt nău ntĭnh bah Wa mpeh n’hao tuch tăm. Bah nĕ geh soan dăng ntrong leo tâm rlong rŏng dak đah ăp nău ƀư na nê̆ kơt ƀư ba lŏ 2 yan, tăm cà phê n’hao săk geh, uĕh kah, tâm rnglăp du nuih n’hâm... n’hanh ăp năm mpôl hên ƀư tăm tơm si “Mro mrăng nkah gĭt Wa”.