Wơt đah mpôl hên ta jay êng ta thôn Duệ, xă Đinh Lạc, nkuăl Di Linh (Lâm Đồng), bu ranh ƀon K’Tiếu (71 năm deh) mhe ndăn jŭt chĭng n’hanh dăp ntŭk ntô gay ngăch ntĭm tŭr chĭng an du rmôt druh ndăm lah oh kon nuĭh K’Ho ta ƀon. Wa an gĭt nơm ndăn đêt mông nar bah rơh rlu nti aơ gay an ăp mon gĭt, ƀư bên mbrơi mbrơi đah nteh chĭng n’hanh nău ntroh n’gôr bah chĭng.

Bu ranh ƀon K’Tiếu nkoch, wa ntơm mĭn joi n’hanh nti tŭr ăp ntil nău chĭng bah năm 14. Rnôk aƀaơ, rnôk tă ta ƀon geh lễ hội bôl ngai wa mĭn joi gay djăt n’hanh nti. Knơm nău ŭch têh nĕ lĕ kơl wa ngăch gĭt n’hanh blău dŏng ăp nău chĭng, nău nteh chĭng. Tă aơ rlău 20 năm, gĭt saơ văn hóa chĭng gông bah ƀon lan nơm lĕ chuêl, wa lĕ hăn rgŏ jă ăp nuĭh nti tay, tât ntĭm đah nuĭh têh n’hanh pơk jrô ntĭm an ăp mon ta lam xă.

“Ăp nar bôk năp jêr jŏt ngăn yor mô geh nuĭh uănh tât. Bu pâl ta mạng Internet, pâl game ăp ntil jêng mô geh nuĭh uănh tât chĭng. Tâm ƀon mô geh nuĭh gĭt tŭr chĭng, tŭr chĭng m’hâm ƀư an pơng di. Yor nê, gâp rblang, hăn nkoch trêng, nkoch tay lịch sử bah chĭng. Gâp dŭng mpŏng, ŭch ngăn ăp mon jrô 7, jrô 8, yor gâp ntĭm mpôl jêt djăt blău ngăch ngăn, hôm nuĭh têh ri jêr wât lơn. Dôl rgum ntĭm an kon sau tâm yan rlu nti aơ, ru ri kuăl tay ăp nuĭh ta jrô ơm tât nti tay ăp khay 2, 3 tơ̆ gay mô chuêl, lah mô ri mbra chuêl lĕ”.

Đah nău nsrôih, dŭt n’hâm ntĭm bah bu ranh ƀon K’Tiếu, tât aƀaơ, xă Đinh Lạc, nkuăl Di Linh lĕ geh rlău 200 nuĭh gĭt tŭr chĭng, tâm nĕ geh rlău 30 nuĭh lah druh ndăm bah câu lạc bộ chĭng ta ntŭk. Tĭng wa M Hiu Nguyên, Bí thư Chi bộ thôn Duệ, xă Đinh Lạc, yor nău dŭt n’hâm bah kruanh ƀon K”Tiếu lĕ ntĭm, ntrŭt nsum mpôl nuĭh K’Ho ta ntŭk aơ ndrel nsrôih nti, mât uĕh drăp ndơ văn hóa chĭng gông bah rnoi mpôl đêt, tâm nĕ geh săk nơm. Wa M Hiu Nguyên an gĭt, lĕ 3 rmôt tâm rnăk wâl geh u, che, ur n’hanh kon bu ur dơi râng ăp jrô nti tŭr chĭng yor bu ranh ƀon K’Tiếu ntĭm.

“Wa lĕ ntĭm dŭt n’hâm. Mpôl hên saơ nău nĕ n’hanh nsrôih nti uĕh ngăn gay dơi gĭt, dơi wât lĕ rngôch ăp nău chĭng. Ăp oh kon hŏk gưl 2, gưl 3, tâm nĕ geh kon bu ur gâp, n’ăp ur gâp hăn nti đŏng. Bah kơi aơ, rgop du gâl mât ndrăy, rƀăy tay nău uĕh văn hóa bah nuĭh K’ho he nơm, gay nteh chĭng, mô dơi roh tĭng mông nar”.

Tĭng wa Trương Quốc Phương, Groi kruanh UBND xă Đinh Lạc, yor nău rgop mô rlu bah bu ranh ƀon K’Tiếu, ăp năm ăp jrô ntĭm tŭr chĭng ta ntŭk dơi mât mro. Bah nĕ, ăp lễ hội way ơm kơt lễ hội kuăl mih, rhơn ba mhe, ăp nău tŭr chĭng, nău njrong xoang, ot ndrong... hăn ndrel đah nău ƀư thể thao, ndơ ngêt sa bah nuĭh rnoi mpôl đêt ta ntŭk lĕ ntơm dơi rdâk ƀư. Tâm 2 năm na nao 2018 n’hanh 2019, xă Đinh Lạc lĕ dâk ƀư lôch uĕh 2 rơh tâm nđŭr văn hóa chĭng gông đah ăp xă, nkuăl têh ta nkuăl. Ăp nău dơi geh aơ geh nău rgop dŭt khlay bah bu ranh ƀon K’Tiếu. Wa Trương Quốc Phương, lah:

“Bu ranh ƀon K’Tiếu lah du hê nuĭh nsing nơm tâm ntŭk gŭ rêh, geh nău rgop dŭt têh mât ndrăy văn hóa chĭng gông Tây Nguyên. Dŭt âk jrô ntĭm ta ntŭk dơi ƀư jêng nău ƀư tơm bah bu ranh ƀon dŭt khlay. Wa lah nuĭh nkre ntĭm, nkre nkoch tay, nkre lah nuĭh hăn nkoch trêng, rgŏ jă ăp rơh râng, lah nuĭh dŭt n’hâm ndơ̆ chĭng lăp ngih sam ƀŭt. Đinh Lạc lĕ geh trong hăn mât ndrăy du đêt văn hóa way ơm êng kơt kho ao, ƀon n’gôn ndrănh, ƀon cheh tanh. Aơ lah nău dŭt n’hâm dơh yor geh nău tâm rgop đah ntŭk ntô chĭng gông đah ăp ƀon nău kan way ơm, dơi an kônh wa n’hao nău geh prăk”.

Đah nău rgop dŭt n’hâm bah nơm tâm nău mât ndrăy ntŭk ntô văn hóa chĭng gông, ăp năm bah năp, bu ranh ƀon K’Tiếu lĕ geh dŭt âk bằng khen bah nkuăl Di Linh n’hanh n’gor Lâm Đồng. Lơn lah, tâm năm 2022, bu ranh ƀon K’Tiếu lap dơi Kruanh dak an nkhôm Nghệ nhân ưu tú yor lĕ geh soan têh mât ndrăy n’hanh mât uĕh drăp ndơ mô mpơl săk bah rnoi mpôl đêt. Rlău ma nĕ, Nghệ nhân ưu tú K’Tiếu lah ngoăy tâm 31 nuĭh mhe dơi Thủ tướng Chính phủ ntrŭnh an bằng khen yor geh âk soan ntrong leo tâm rlong dak; ntoh lư gĭt blău bah n’gor Lâm Đồng dơi nkoch râng rƀŭn nchră rnê rhơn ntoh lư gĭt blău lam dak di 75 năm Nar Kruanh Hồ Chí Minh hăn kuăl jă tâm rlong rŏng dak (11/6/1948-11/6/2023).