Aơ lah năm tal 5 rơh tâm rlong cà phê kah Việt Nam dơi ƀư. Râng tâm rlong cà phê kah Việt Nam năm aơ geh 47 ntŭk kan bah 7 n’gor đah 84 ntil ndơ râng tâm rlong, dĭng lĕ ndơ 157 tấn. Ta rwăch n’glêh dŭt, Ban giám khảo lĕ săch geh 46 ntil uănh lah dăp bôk năp, tal 2, tal 3 kơt săch luh top 10 ntil cà phê kah năm 2023. Wa Trịnh Đức Minh, Kruanh Hiệp hội cà phê Buôn Ma Thuột, Kruanh ban rdâk ƀư rơh tâm rlong an gĭt: rwăch n’glêh dŭt ƀư bah nar 25-28/4/2023.

Bah meng ăp nkô̆ nău tâm rlong hôm geh du đêt nău ƀư mpla nsơ, rhŏ cà phê; mpla nsơ ndơ dŏng, măy mŏk, ndrôk sam ƀŭt, phân poh nău kan cà phê; nsơr mbli; nău pâl geh ndơ nkhôm. Lơn lah, jêh rơh tâm rlong ƀư mbra uănh lah ndơ cà phê kah ngăn gay tâm di nău ŭch tăch n’hanh n’hao rnoh khlay an cà phê kah bah Việt Nam.