Măng nơh (17/8), ta Trung tâm văn hóa n’gor Dak Lak hŏ ntơm pơk Liên hoan Njroh mprơ nsum mpôl tâl 17 năm 2023 đah nkô̆ “Dak Lak n’gloh nar mhe”.  Râng Liên hoan rơh dja geh bơi 600 cán bộ, diễn viên bah 15 Mpôl njroh mprơ nsum mpôl tât bah ăp Jrô kan Văn hóa n’hanh thông tin, Trung tâm Văn hóa ăp nkuâl, thị xã, nkual ƀon têh n’hanh Bộ Chỉ huy Quân sự n’gor Dak Lak.

82 nkô̆ nău mprơ, nău uh goh n’hanh ăp ntil nău njroh mprơ sân khấu ta liên hoan lah ăp nău njroh mprơ ntoh lư dơi sơch bah ăp rơh tâm rlong tâm dâng. Nkô̆ hôr lah mprơ rnê Đảng quang vinh, Wa  Hồ têh kuâng, nău rŏng ƀon tơm neh dak, nău rêh uĕh lăng ta dor yôk Dak Lak; ăp nău dơi chrat ang bah cách mạng Việt Nam n’hanh rơh rgâl mhe neh dak rlău 35 năm aơ; hôr nău nsing nơm bah ƀon lan tâm nău rđău kan bah Đảng, nsrôih rdâk njêng n’hanh mât njrăng neh dak Việt Nam xã hội chủ nghĩa.