Ôi 8/3, Bảo tàng Dak Lak ƀư ntơm pơk pla n'hơ way nkô̆ "Ndơ nsoh way ơm ăp rnoi mpôl đê̆ ta Dak Lak" n'hanh nkoch mbơh nău kan rgâl mbrô ta Bảo tàng. Ƀư ntơm bah aơ tât lĕ khay 4 tât, way nkô̆ "ndơ nsoh way ơm ăp rnoi mpôl đê̆ ta Dak Lak" lah 175 ndơ hôm geh mât n'hanh rup gui, ndơ nsoh way ơm bah 48 rnoi mpôl đê̆ dôl gŭ rêh ta Dak Lak.

Ăp ndơ hôm mât dơi pla n'hơ jêng 8 bôk nkô̆ tâm ban đah 8 rmôt nău ngơi, nkoch n'hơ rup uĕh săk ntơr văn hóa, nău rêh bah ƀon lan ăp rnoi mpôl đê̆ tâm ăp ndơ nsoh way ơm, ndơ nkrơ̆ n'hanh ndơ dŏng ăp nar bah khân păng. Ndrel đah nê, tâm jâng gung pla n'hơ hôm geh ăp nău kan rlong ŭanh saơ đŏng kơt: rui brai, nkoch mbơh du đêt ndơ kah khlay bah Dak Lak, kơt ƀư ngăn n'hanh rlong sa ăp ndơ sa way ơm bah nuĭh Rđe. Nkhêp geh rnôk dja, Bảo tàng Dak Lak nkoch mbơh nău kan rgâl mbrô dơi an ƀư ta đơn vị đŏng kơt: ntoh măt n'hanh n'glăp dŏng máy mbơh rblang êng rhŏ an năch lăp hăn ŭanh ntŭk  pla n'hơ; ntĭm nti năch pâl nđaih dŏng App pơk uănh ta ăp ndơ pet điện tử ; tâm  dâl đah ăp ndơ hôm mât ma trong công nghệ ntŭk uănh 3D; rlong rêh ma ăp ndơ ntrŭp dŏng thực tế ảo.