Tây Nguyên lah nkual neh sâm geh bri dak neh ntu đah nău uĕh n’hanh văn hóa ta ntŭk, ntŭk gŭ bah 47 rnoi nuĭh oh nô, geh tâm nuih n’hâm âk drăp ndơ ơm yău, kơt: Ntŭk ntô uĕh ơm chĭng gông Tây Nguyên, ndơ nkoch trêng đah mbung n’hanh drăp ndơ văn hóa mô mpơl săk bah kon nuĭh; ăp lễ hội tâm rlong rveh, ƀư brah ntlơi môch, sam ba mhe... nău uĕh lĕ rnoi nuĭh mpôl đêt. Đah bôk nău “Du rơh hăn, âk ntŭk tât”, nău kan Pâl nđaih ăp n’gor Gia Lai, Dak Lak n’hanh Kon Tum lĕ nkoch tât ăp ntŭk, doanh nghiệp pâl nđaih ta Hải Phòng ăp nău geh pâl nđaih bah ăp ntŭk kơt ăp ntŭk tât ntoh lư, ăp tuor boăt nthoi tâm trong hăn ndơ̆ năch uănh Tây Nguyên uĕh Wa Nguyễn Đức Hoàng, Groi Giám đốc N’gâng kan Văn hóa Thể thao n’hanh Pâl nđaih n’gor Gia Lai an gĭt:

Đah âk nău uĕh văn hóa êng, ndơ sông sa êng đah Hải Phòng n’hanh ăp n’gor Tây Nguyên, lơn lah Gia Lai ri gâp nsing nơm lah năch pâl nđaih Gia Lai kơt dŭt ŭch rnôk hăn pâl nđaih Hải Phòng n’hanh plơ̆ tay. Mpôl hên mbra tâm rgop đah ăp doanh nghiệp đah 2 n’gor gay m’hâm ƀư trong hăn ăp mpôl năch n’hanh boăt nthoi, mô di lah ăp tuor ma ma geh ăp mpôl kon hŏk, phung pah kan, tahen ơm... mpôl hên mĭn lah lah bôk nău kan dŭt ngăn ngên n’hanh săk rnglăy.

Nkoch ăp nău geh, nău dơh, nău blău ơm ntoh lư hun hao pâl nđaih bah Hải Phòng, Wa Vũ Huy Thưởng, Groi Giám đốc N’gâng kan Pâl nđaih Hải Phòng an lah rƀŭn nchră hun hao pâl nđaih aơ lah nău ƀư ngăn ngêt gay ntrôl hun hao ăp nkual, ntơm ntrôl dăng rdâk njêng, hao ngăch pâl nđaih săk rnglăy, nâp nâl.

Nar aơ mpôl hên wơt 3 ntŭk tât ntrŭt ngăch pâl nđaih njrăng n’hanh lah du nău tât an njrăng nkoch ăp ndơ ăp bri dak neh ntu pâl nđaih uĕh tât đah ăp năch pâl nđaih bah ăp n’gor Tây Nguyên. Aơ lah du nău dŭt n’hâm dơh n’hanh nău ƀư aơ mbra dơi n’hao tâm năm tât, mô knŭng êng đah Tây Nguyên ma đah ăp nkual ta lam dak, nu nău ăp tuor hăn, ăp ndơ pâl nđaih uĕh an năch.

Ta Rƀŭn nchră, kruanh N’gâng kan Pâl nđaih hải Phòng, kruanh N’gâng kan Văn hóa, Thể thao n’hanh Pâl nđaih 3 n’gor Tây Nguyên lĕ ký ton bôk nău kan tâm rgop hun hao pâl nđaih đah nău ŭch n’hao tâm rgop kan ndrel joi ƀư, ntrôl nău kan pâl nđaih hun hao, ndâk njêng ndơ pâl nđaih mhe. Ndrel đah nĕ lah ntrôl dăng trong kan mpla nsơ, ntrŭt ngăch, ndâk njêng moh êng, n’hao mpla  nsơ rup gui pâl nđaih bah 3 n’gor Dak Lak, Gia Lai, Kon Tum tât ntŭk tăch rgâl Hải Phong n’hanh Plŏ tay.