Nau ơm bah Tây Nguyên lah nsum, rnoi Rđe, Jrai lah êng geh gĭt tât lah du nau ueh ngăn tâm nau vay ơm tur chĭng bah Tây Nguyên. Aơ lah nau ơm nkoch ma mbung, ntoh nau vay ơm, nau mơng, nau geh dơi bah ăp rnoi mpôl đê̆ ta Tây Nguyên.

Ntơm nau ơm Dăm Săn bah rnoi Rđe geh mbơh bôk năp tâm năm 1972, tât rnôk aơ hŏ geh rlau 100 ntil nau ơm bah ăp rnoi ta Tây Nguyên geh joi, mbơh, nkra jêng săm ƀŭt. Yơn lah, bah năp nau khuch bah âk ntil, rnôk aơ nau ơm bah Tây Nguyên lah nsum, rnoi Rđe, Jrai lah êng păng rdâng đah nau roh rui. Bah năp nau aơ, Ntŭk kan bah Radio Việt nam tâm nkuăl Tây Nguyên nchrăp nau mât, ƀư ueh nau vay ơm bah Tây Nguyên lah nsum, nau ơm rnoi Rđe, Jrai lah êng tâm nau ntoh ngơi rnoi mpôl đê̆ ta Tây Nguyên.

Tâm rnôk tâm nchră, ăp ntoh măt nchră mpeh nau kan, nau dôl geh gay ma nau vay ơm bah rnoi Rđe, Jrai nau kan bah mât ngih dak đah nau mât nau vay ơm Tây Nguyên. Ăp ntoh măt tâm ban nau mĭn lah, rơh rlau aơ, nau ơm bah rnoi tây Nguyên lah nsum, nau ơm bah rnoi Rđe, Jrai lah êng geh kơl an, mât đah aka nau kơt: Mbơh kloh tâm ăp ntŭk ntoh ngơi, ntoh rup, mạng Internet, ntĭm nti tâm ngih săm ƀŭt, tâm ƀin lan kŏ kơt lah ƀư nau tâm rlong, bôk nau kan tâm n’ur nau ơm.

Tĭng Groi Giáo sư, Tiến sĩ Buôn Krông Tuyết Nhung, ntrong kan rnôk aơ lah nau ntĭm nti bah ntŭk mbơh nkoch nau. Yơn lah, ăp nau săch mbơh âk ngăn rnôk aơ mô âk rđi nau geh âk ntil bah nau ơm dôl geh:

"Jŏ ma aơ, nau kan nau ơm yau geh joi, rbang, mbơh, yơn rnoh nau ơm bah ăp rnoi mpôl ta Tay Nguyên, tâm nê geh Rđe, Jrai mô âk rđil đah ăp nau ơm geh ma nơm geh joi saơ. Hên hŏ, dôl ndrel mra lŏ geh nau ngơi đă nkoch mbơh tay nau ơm aơ ân ƀon lan, ndrle nau kan bah VOV lah ngoai tâm ăp rmôt kan khlay lah nơm geh dnơn nau aơ. Nơm mô knŭng dŏng păng gay ma rblang gay ma kơl an nau ntoh ngơi ma nơm ân geh du ntil ndơ ƀư jêng rnoh, nkoch mbơh mât mô êng tâm dak ma hôm dâk ba dih”.

Nchră tât nau ƀư bah VOV Tây Nguyên tâm nau nsôih mât nau ơm bah Tây Nguyên kŏ kơt lah nau ơm rnoi Rđe, Jrai, đah nau dơi bah du rmôt kan mât ngih dak, wa Lại Đức Đại, Groi Giám đốc Sở Văn hoá, Thể Thao ndrel pâl n’aih Dak Lak ân lah, nau mât nau ơm tâm ntŭk ntoh ngơi lah nau kan ueh tâm nau bư ân trêng nau ơm aơ tâm ƀon lan:

‘Nau kan mât nau ơm bah ntŭk ntoh ngơi ngăn lah nau mât ân ueh ngăn. Yor nau ơm geh ntoh ma nau ngơi, nau nkoch, nau mprơ, ma knŭng geh ntŭk nkoch mbơh nau ngơi mơ dơi ntoh ueh ngăn. Yor ntŭk ntoh nau ngơi tât đah nkual jru ngai ndrel tât dơi đah ăp ntil nŭih tât ăp ntrong, ăp nŭih. Ăp ntŭk ƀư nau kan ntoh ngơi gay ma săch nau kan ndâk njêng mhâm ƀư ân păng săk tam, nsing tâm nau dơi geh bah nơm”.

Yuh Phạm Thuý Ngọc, Kruanh jrâu kan Nau ngơi rnoi mpôl đê̆, VOV Tây Nguyên mbơh, gay dơi ƀư ân săk tam nau kan mât nau ơm tâm ntŭk ntoh ngơi tâm ntŭk kan nơm, ri ân geh nau tâm rgop ngăn bah ăp ntŭk, ăp rmôt mĭn njêng, ăp rmôt kan mât ngih dak gay dơi geh ăp nau kan ntoh ngơi geh nau khlay ngăn:

‘Rmôt nghệ nhân, nghệ sĩ, tri thức ndrel ăp nŭih mĭn, khân păng dôl ma nkhah du nau nkhah ndal ngăn mpeh nau roh rui bah nau ơm yau tâm ƀon lan. Ndrel ăp nŭih ƀư nau ntoh ngơi ân geh mĭn, ân nơm tâm nau tât, nau dôl geh rnôk aơ ân mhâm ƀư păng ân geh tâm ban ngăn, dơi rdâng ngăn tâm di gay leo dơi nau ơm bah Tây Nguyên ndrel nau khlay bah ơm yau bah Tây Nguyên tât ma kônh wa ăp rnoi mpôl đê̆ Tây Nguyên, bu gĭt ndrel bu ŭch mât păng, ŭch djăt păng ndrel leo nau ơm aơ rêng trêng tay”.

Nau ơm yau lah nau nkoch, nau ndrong nkoch mô êng ma nau tâm ndrĭng ma hôm đah nau mprơ, nau nkoch. Rnôk aơ, tâm ƀon lan, nŭih geh nau blau mprơ, nkoch nau ơm dôl ma roh hêng, yor ăp bu rang blau nkoch ndrong ơm hŏ sĭt ma drâu phan. Ăp nau hôm e rnôk aơ lah nau geh joi, ndrôm săm ƀŭt, njêng jêng phim, nkoch mbơh ân rơh mom. Mĭn lah, nau ntrơn rgâl mrô đah nau ƀư rhôp nau ngơi hŏ tă geh dơi joi, leo klơ mạng Internet, leo tâm ntŭk ntoh nau ngơi ndrel ƀư nau nkoch n’ơn bar nau ngơi (nau rnoi Yoăn ndrel rnoi mpôl đê̆) ri ăp rơh mom ăp rnoi TâyNguyên hôm nau dơi gay ma gĭt lơn tay mpeh ăp nau ơm yau ueh ngăn bah u che nơm lơi an./.